कवी प्रा. जिजा शिंदे यांचा सन्मान:’श्याम मनोहर साहित्य आणि समीक्षा’ ग्रंथास दगडूलाल स्मृती संस्कृती पुरस्कार जाहीर

कवी, प्राध्यापक आणि समीक्षक जिजा शिंदे यांच्या ‘श्याम मनोहर साहित्य आणि समीक्षा’ या ग्रंथास दगडूलाल स्मृती संस्कृती पुरस्कार जाहीर झाला आहे. इचलकरंजी येथील संस्कृती प्रतिष्ठानतर्फे हे पुरस्कार देण्यात येतात. प्रा. जिजा शिंदे हे छत्रपती संभाजीनगर येथील देवगिरी महाविद्यालयात कार्यरत आहेत. कविता आणि समीक्षा लेखनात त्यांचा हातखंडा आहे. या पुरस्काराबद्दल त्यांचा गौरव होत आहे. कादंबरी, कवितेचाही गौरव इचलकरंजीच्या संस्कृती प्रतिष्ठानने आपल्या पुरस्कारांची नुकतीच घोषणा केली. त्यात कादंबरी आणि कविता या साहित्य प्रकारात कोल्हापूर येथील डॉ. रमेश साळुंखे यांच्या ‘भिंगुळवाणे दिवस’ या कादंबरीला लक्ष्मण कांबळे (जिंदा) स्मृती कादंबरी पुरस्कार, तर मुंबई येथील उदय जाधव यांच्या ‘पांढऱ्या शुभ्र स्क्रीनवर’या कवितासंग्रहासाठी वसंत कमल स्मृती संस्कृती काव्य पुरस्कार जाहीर झाला आहे. समीक्षेमध्ये प्रा. जिजा शिंदे यांच्या अष्टगंध प्रकाशन (ठाणे) यांनी प्रकाशित केलेल्या ‘श्याम मनोहर साहित्य आणि समीक्षा’ ग्रंथास दगडूलाल स्मृती संस्कृती समीक्षा पुरस्कार जाहीर झाला आहे. लवकरच सन्मान सोहळा कोल्हापूरच्या शिवाजी विद्यापीठाचे प्रो. आणि समीक्षक रणधीर शिंदे, कवयित्री आणि समीक्षक अंजली कुलकर्णी (पुणे) यांच्या निवड समितीने या पुरस्कारांची निवड केली.मान्यवर पुरस्कार्थींचा लवकरच एका सोहळ्यात गौरव होईल, असे संस्कृती प्रतिष्ठानचे अध्यक्ष महावीर कांबळे, उपाध्यक्ष पंडित कांबळे, सचिव अनुराधा कांबळे, खजीनदार विभावरी कांबळे, संजय रेंदाळकर, दत्तात्रय लाळगे पाटील, सुनील कोकणी यांनी कळवले आहे.