बातमी ऐका (Marathi Voice Reader)
पुणे जिल्ह्यातील 17 नगरपालिकांपैकी 9 नगरपालिकांवर उपमुख्यमंत्री अजित पवार यांच्या नेतृत्वातील सत्ताधारी राष्ट्रवादी काँग्रेसचा नगराध्यक्ष निवडून आला आहे. त्यामुळे अजित पवार हेच पुणे जिल्ह्याचे कारभारी असल्याचे पुन्हा एकदा स्पष्ट झाले आहे. सर्वोच्च न्यायालयाच्या आदेशानुसार अखेर राज्यातील नगरपंचायती व नगर परिषदांच्या निवडणुका पार पडल्यात. आज झालेल्या मतमोजणीत भाजप हा पहिल्या क्रमांकाचा पक्ष ठरला असून, सत्ताधारी शिवसेना व राष्ट्रवादी काँग्रेस हे अनुक्रमे दुसऱ्या व तिसऱ्या क्रमांकावर आहेत. विरोधी बाकावरील महाविकास आघाडीतील काँग्रेस वगळता शिवसेना उद्धव बाळासाहेब ठाकरे पक्ष व राष्ट्रवादी काँग्रेस पार्टी शरदचंद्र पवार पक्षाचा कोणताही करिश्मा या निवडणुकीत चालला नाही. त्यांना एक आकडी संख्येतच समाधान मानावे लागले. या पार्श्वभूमीवर अजित पवारांनी आपला पुणे व पिंपरी चिंचवडा बालेकिल्ला राखण्यात यश मिळवले आहे. पुण्याला चिकटून असणारे पिंपरी – चिंचवड हे शहर अजित पवारांचा बालेकिल्ला होता. पण 2017 च्या निवडणुकीत भाजपने या बालेकिल्ल्याला सुरुंग लावला. त्यांनी राष्ट्रवादीची 15 वर्षांची सत्ता उलथवून टाकली. त्यानंतर मुख्यमंत्री देवेंद्र फडणवीस यांनी पिंपरी चिंचवडकडे विशेष लक्ष दिले. पण निवडणुका जाहीर झाल्यानंतर अजित पवारांनी पुणे, पिंपरी – चिंचवड व ग्रामीण पुण्यात जातीने लक्ष घातले. जनसंपर्कावर अधिक भर दिला. त्याचे फळ त्यांना स्थानिक स्वराज्य संस्थांच्या निवडणुकीत मिळाले आहे. कोण कुठे झाले विजयी? आज झालेल्या मतमोजणीत जिल्ह्यातील 17 पैकी 9 पालिकांमध्ये राष्ट्रवादी काँग्रेसचे 9 नगराध्यक्ष निवडून आलेत. तर शिंदे गटाला 4, तर भाजपला अवघ्या 3 जागांवर समाधान मानावे लागले आहे. यामुळे पुणे जिल्ह्यावर अजित पवारांचीच जादू असल्याचे पुन्हा एकदा अधोरेखित झाले आहे. लोणावळ्यात राष्ट्रवादीचे राजेंद्र सोनवणे, दौंडमध्ये दुर्गादेवी जगदाळे, शिरूर येते ऐश्वर्या पाचरणे, इंदापुरात भरत शाह, जेजुरीत जयदीप बारभाई, भोरमध्ये रामचंद्र आवारे, बारामतीत सचिन सातव, फुरसुंगी येथे संतोष सरोदे व वडगाव मावळ नगरपंचायतीत राष्ट्रवादीच्या आंबोली ढोरे विजयी झाल्या. माळेगावात अपक्ष उमेदवाराचा विजय दुसरीकडे, चाकण येथे शिंदे गटाच्या मनीषा गोरे, जुन्नर येते सुजाता काजळे, राजगुरूनगर येते मंगेश गुंडा व मंचर येते राजश्री गांजले विजयी झाल्यात. तर सासवड येथे भाजपच्या आनंदी काकी जगताप, आळंदी येथे प्रशांत कुराडे व तळेगावात संतोष दाभाडे यांचा विजय झाला आहे. माळेगाव नगरपंचायतीत जयश्री तावरे या अपक्ष महिला आमदाराचा विजय झाला आहे.
