केळापूर तालुका प्रतिनिधी सागर मुडे
पांढरकवडा मकरसंक्रांतीच्या पार्श्वभूमीवर नैसर्गिक पर्यावरण संवर्धन व मानवता विकास संस्था तसेच वनविभागाच्या वतीने नायलॉन मांजाचा वापर टाळावा, या उद्देशाने पांढरकवडा येथील वनपरिक्षेत्र कार्यालयाच्या माध्यमातून जनजागृतीपर उपक्रमाचे आयोजन करण्यात आले.
या उपक्रमात नायलॉन मांजामुळे गंभीर जखमी झालेले पक्षी, तुटलेली पंखं, रक्तबंबाळ अवस्था तसेच मानवी अपघातांची उदाहरणे प्रत्यक्ष दाखवून नागरिकांमध्ये जनजागृती करण्यात आली. क्षणिक करमणुकीसाठी अनेक निष्पाप जीवांचे प्राण जात असल्याची विदारक वास्तवता यावेळी स्पष्ट करण्यात आली.
उपक्रमादरम्यान “नायलॉन मांजाचा वापर टाळा”, “पर्यावरण वाचवा, जीव वाचवा” असे संदेश देत नागरिकांना पर्यावरणपूरक सण साजरा करण्याचे आवाहन करण्यात आले. नायलॉन मांजा हा पर्यावरण व वन्यजीवांसाठी अत्यंत घातक असून त्याच्या वापरावर शासनाने बंदी घातलेली आहे. त्यामुळे मकरसंक्रांत साजरी करताना कापसाच्या मांजाचा वापर करावा, असे आवाहन यावेळी करण्यात आले.
या जनजागृती उपक्रमात नैसर्गिक पर्यावरण संवर्धन व मानवता विकास संस्थेच्या महाराष्ट्र राज्य महिला अध्यक्षा डॉ. प्रिती तोटावार, वनपरिक्षेत्र अधिकारी व्ही. एम. दुबे, भारत वाघाडे, सुनिता पाटील, मनोरमा घाटोळे, हिंमत सापळे, वनरक्षक आर. एस. सोनी, आर. बी. मानकर, पी. डी. दुधे, एस. बी. शेंडे, वनपाल ए. डी. कुडमेथे, एम. ए. मिंदेवार, ऑपरेटर योगेश जाधव,
वाहनचालक निखिल आगरकर तसेच वनमजूर अंजना नैताम आदी उपस्थित होते.या उपक्रमामुळे नागरिकांमध्ये नायलॉन मांजामुळे होणाऱ्या दुष्परिणामांविषयी जागरूकता निर्माण झाली असून पर्यावरणसंवर्धनासाठी सामूहिक प्रयत्नांची गरज व्यक्त करण्यात आली.
