बातमी ऐका (Marathi Voice Reader)
हिंगोली जिल्ह्यात काँग्रेसला उभारी देण्यासाठी प्रदेश पातळीवरून हालचाली सुरु झाल्या असून प्रदेशाध्यक्ष हर्षवर्धन सपकाळ यांनी माजी आमदार डॉ. संतोष टारफे यांच्याशी भ्रमणध्वनीवरून चर्चा केली आहे. त्यांना मुंबई येथे चर्चेसाठी येण्याचे निमंत्रणही दिले आहे. त्यामुळे जिल्हयातील राजकिय हालचाली गतीमान झाल्या आहेत. हिंगोली जिल्ह्यात काँग्रेस पक्षाची अंतर्गत गटबाजीने वाताहात झाली आहे. कळमनुरीचे माजी आमदार डॉ. संतोष टारफे, हिंगोलीचे माजी आमदार भाऊराव पाटील गोरेगावकर, काँग्रेसचे तत्कालीन जिल्हाध्यक्ष संजय बोंढारे, दिलीप देसाई यांनी पक्षातील गटबाजीला कंटाळून पक्षाचे राजिनामे दिले आहेत. त्यामुळे पक्षामध्ये वसमत तालुका वगळता इतर ठिकाणी मोठा नेताच शिल्लक राहिला नाही. त्यातच आता विधान परिषद सदस्या डॉ. प्रज्ञा सातव यांनी पदाचा राजिनामा देऊन भाजपात प्रवेश केला. त्यामुळे पक्षाची स्थिती अत्यंत दयनिय झाली आहे. दरम्यान, हिंगोली जिल्ह्यात काँग्रेस पक्षाला पुन्हा उभारी देण्यासाठी वरिष्ठ पातळीवरून प्रयत्न सुरु झाले आहेत. या संदर्भात पक्ष निरीक्षक साहेबराव कांबळे यांनी जिल्हयातील सर्व घटनाक्रमाची माहिती वरिष्ठ नेत्यांच्या कानावर टाकली आहे. त्यानंतर वरिष्ठ पातळीवरून हिंगोली जिल्हयाकडे विशेष लक्ष देण्यास सुरवात केली आहे. त्यानुसार पक्षाचे प्रदेशाध्यक्ष हर्षवर्धन सपकाळ यांनी काँग्रेसचे माजी आमदार डॉ. संतोष टारफे यांच्याशी भ्रमणध्वनीवरून संपर्कही साधला आहे. त्यांना काँग्रेसमध्ये पुन्हा प्रवेशाची गळ घातली आहे. त्यासाठी चर्चा करण्यासाठी मुंबईत येण्याचे निमंत्रणही दिले आहे. तर दुसरीकडे हिंगोलीच्या माजी पालकमंत्री खा. वर्षा गायकवाड यांनीही डॉ. टारफे यांच्यासह त्यांच्या समर्थकांशी संपर्क साधला असून पक्षात पुन्हा परतण्याची अटकळ घातली आहे. त्यामुळे आता वरिष्ठ पातळीवरूनच राजकिय हालचाली गतीमान झाल्या आहेत. यासंदर्भात काँग्रेसचे हिंगोली जिल्हा निरीक्षक साहेबराव कांबळे यांनी लवकरच हिंगोलीत येणार असून पक्षाच्या पदाधिकाऱ्यांची बैठक घेऊन नव्याने कार्यकारीणी जाहिर केली जाणार असल्याचे सांगितले. ज्या ठिकाणी पदे रिक्त आहेत त्या ठिकाणी कार्यकर्त्यांची निवड केली जाणार असूुून बुथ पातळीपासून ते जिल्हा पातळीपर्यंतच्या कार्यकारीणीत बदल केले जाणार असल्याचे सांगितले. माजी आमदार डॉ. टारफेंचा वेट अँड वॉच काँग्रेसच्या प्रदेशपातळीवरील नेत्यांनी संपर्क साधला असला तरी दुसरीकडे मात्र माजी आमदार डॉ. टारफे यांनी वेट ॲण्ड वॉचची भुमीका घेतली आहे. या संदर्भात त्यांच्याकडून कुठलेही भाष्य करण्याचे करण्याचे टाळले जात आहे.
