सुरेश पाचभाई मारेगाव
मारेगाव तालुक्यातील कोसारा येथील श्री हनुमान मंदिर, विठ्ठल-रुख्मिणी मंदिर व श्री संत नानाजी महाराज मंदिराच्या भव्य पटांगणात मिती माघ शुद्ध ७, रविवार दि. २५ जानेवारी २०२६ ते मिती माघ पौर्णिमा, रविवार दि. १ फेब्रुवारी २०२६ या कालावधीत १६ वे श्रीमद् भागवत कथा व ज्ञानयज्ञ सप्ताह मोठ्या भक्तिभावाने आयोजित करण्यात आला आहे.
या पवित्र सोहळ्याचे भागवताचार्य ह.भ.प. श्री प्रविणजी महाराज काटकर (श्रीक्षेत्र मालखोडी देवस्थान, गोजी, ता. जि. वर्धा) असणार आहेत. सप्ताहाच्या पहिल्या दिवशी सकाळी कलशस्थापना व हनुमंतरायाचा अभिषेक ह.भ.प. श्री अनिलजी पुरी महाराज यांच्या हस्ते होणार असून सायंकाळी भागवत कार्यक्रमास प्रारंभ होईल. दररोज पहाटे काकडा भजन, सकाळी व सायंकाळी श्रीमद् भागवत प्रवचन तसेच सायंकाळी हरिपाठाचे आयोजन करण्यात आले आहे.
भागवत कथेत प्रत्यक्ष व्यास दर्शन, नारद देवर्षी, परीक्षिती, सनक-सनकादिक, भक्त प्रल्हाद, हिरण्यकश्यप, वामन अवतार, बळी अवतार, तसेच राम-गोपाल लीला, गोवर्धन लीला, कंसवध आदी प्रसंगांची भव्य झाकी सादर होणार आहे. कार्यक्रमात विविध नामवंत हरिभक्त परायण महाराज, गायक, वादक व भजन मंडळींचा सहभाग लाभणार आहे.
रविवार दि. १ फेब्रुवारी २०२६ रोजी सकाळी १० ते १२ या वेळेत श्रीमद् भागवत ग्रंथ व श्री संत नानाजी महाराज यांच्या पालखीचा दिंडी सोहळा संपूर्ण गावातून निघणार आहे. त्यानंतर ह.भ.प. गौरव महाराज ठाकरे (वर्धा) यांचे गोपालकाळ्याचे कीर्तन होणार आहे.
सप्ताह काळात विविध दिवसांसाठी सकाळचा नाश्ता तसेच दुपार व रात्रीच्या भोजन पंगतीसाठी गावातील अन्नदात्यांनी सेवा स्वीकारली असून समारोपाच्या दिवशी महाप्रसाद होणार आहे.
या धार्मिक व आध्यात्मिक सोहळ्याचा लाभ भाविकांनी मोठ्या संख्येने घ्यावा, असे आवाहन समस्त गावकरी मंडळी व ग्रामपंचायत कोसारा (सोईट) यांच्या वतीने करण्यात आले आहे.
