विद्यार्थ्यांना पोलीस कार्यप्रणाली व कायद्यांची माहिती
सुरेश पाचभाई मारेगाव
मारेगाव पोलीस वर्धापन दिनाचे औचित्य साधून मारेगाव पोलीस स्टेशन, जिल्हा यवतमाळ यांच्या वतीने समाजप्रबोधन व कायदेविषयक जनजागृती कार्यक्रमाचे आयोजन करण्यात आले. या उपक्रमांतर्गत विद्यानिकेतन इंग्लिश मीडियम स्कूल, मारेगाव येथील विद्यार्थ्यांना पोलीसांच्या दैनंदिन कामकाजाबाबत सविस्तर मार्गदर्शन करण्यात आले.
कार्यक्रमात पोलीस स्टेशनमधील दैनंदिन कार्यपद्धती, तक्रार नोंद प्रक्रिया, गुन्ह्यांचा तपास तसेच आपत्कालीन परिस्थितीत पोलीसांची भूमिका याविषयी माहिती देण्यात आली. यासोबतच महिला विषयक कायदे, सायबर गुन्हे, गुड टच–बॅड टच, बालसुरक्षा, नवीन कायदे व कायद्यातील बदल यांबाबत विद्यार्थ्यांना मार्गदर्शन करण्यात आले. आपत्कालीन मदतीसाठी 112, महिलांसाठी 1091 व बालहेल्पलाईन 1098 या क्रमांकांची माहितीही देण्यात आली.
विद्यार्थ्यांनी प्रश्नोत्तरांच्या माध्यमातून सक्रिय सहभाग नोंदवत कायद्याविषयीच्या शंका दूर केल्या. या उपक्रमामुळे विद्यार्थ्यांमध्ये कायदेविषयक जागरूकता वाढून पोलीस व नागरिक यांच्यातील विश्वास अधिक दृढ होण्यास मदत होणार असल्याचे मत व्यक्त करण्यात आले.
हा कार्यक्रम मारेगाव पोलीस स्टेशनचे पोलीस निरीक्षक श्याम वानखेडे यांच्या मार्गदर्शनाखाली पार पडला. यावेळी सहाय्यक पोलीस निरीक्षक दीपक गावंडे, पोलीस हेडकॉन्स्टेबल शंकर बारेकर, कॉन्स्टेबल नामदेव भटारकर, कपिल जीवने, राजन इसलकर तसेच इतर पोलीस कर्मचारी उपस्थित होते.
