संभाजीनगरसह अनेक जिल्ह्यांत सोमवारनंतर पारा 2 ते 3 घटणार:मराठवाड्यासह राज्यात पुढील 2 दिवस ढगांचे, नंतर थंडी

मराठवाड्यासह राज्यात पुढील ४ दिवस हवामान स्वच्छ व कोरडे राहील, असा अंदाज हवामान विभागाने वर्तवला आहे. ढगाळ वातावरणामुळे राज्यातील बहुतांश भागात थंडीचा जोर कमी झाला आहे. पण पुढील ५ दिवसांत छत्रपती संभाजीनगरसह अनेक ठिकाणी तापमानात २ ते ३ अंशांची घट पाहायला मिळू शकेल. अरबी समुद्रासह बंगालच्या उपसागरात कमी दाबाचे क्षेत्र तयार होत आहे. त्यामुळे चक्रीवादळासाठी पोषक स्थिती निर्माण होत असल्याने ढगाळ हवामान तयार झाले आहे. परिणामी, किमान तापमान वाढल्याने थंडीचा प्रभाव कमी झाला आहे. पुढील काही दिवस अशीच स्थिती कायम राहील, असे हवामान विभागाकडून सांगण्यात आले आहे. मात्र त्यानंतर तापमानात काही अंशी घट शक्य आहे. हवामान विभागाच्या संकेतस्थळानुसार, छत्रपती संभाजीनगरचे तापमान सध्या १४.६ अंशावर असलेले तापमान, ५,६ तारखेला १३ अंशावर व त्यानंतर ११ अंशावर येण्याचा अंदाज आहे. सोलापूरमध्ये सध्या १९.५ अंशावरील तापमान, पुढे १८ ते १७ अंशावर येईल. अशीच स्थिती इतर ठिकाणीही सरासरीने कायम राहणार आहे. मराठवाड्यात ८ जानेवारीपर्यंत तुरळक ठिकाणी सरासरीपेक्षा कमी पावसाचीही शक्यता आहे. किमान तापमानात घट, कमाल कायम पुढील चार -पाच दिवस मराठवाड्यातील किमान तापमानात घट पाहायला मिळणार आहे. तर कमाल तापमान २४° ते २६° अंशाहून अधिक राहिल. – डॉ. कैलास डाखोरे, हवामान शास्त्रज्ञ, कृषी विद्यापीठ, परभणी उत्तरेत पुन्हा थंडीची लाट गत काही दिवसांत खंडित झालेली उत्तरेकडील शीतलहर जम्मू-काश्मीर व हिमाचल प्रदेशात बर्फवृष्टीमुळे पुन्हा सक्रिय झाली आहे. त्यामुळे उत्तरेकडील राज्यात तीव्र थंडीची लाट तसेच धुके पसरले आहे. तेथेही पुढील चार दिवस ही स्थिती कायम राहणार आहे. पंजाब, दिल्ली, हरियाणा राज्यात सध्या तीव्र थंडीचा ऑरेंज अलर्ट देण्यात आला आहे. उत्तरेतील थंडीची लाट महाराष्ट्रात ढगाळ वातावरण हटताच पुन्हा थंडीचा जोर वाढवण्यास कारणीभूत ठरेल.