बातमी ऐका (Marathi Voice Reader)
शिवसेना उद्धव बाळासाहेब ठाकरे पक्षाचे नेते अंबादास दानवे यांनी छत्रपती संभाजीनगर येथील घाटी रुग्णालयाचे अधिष्ठाता डॉ. शिवाजी सुक्रे यांच्यावर गंभीर आरोप केले आहेत. डॉ. सुक्रे उमेदवारांना धमकावत असल्याचा दावा करत दानवे यांनी निवडणूक आयोगाकडे त्यांच्या निलंबनाची मागणी केली आहे. गेल्या दोन दिवसांपासून दानवे राजकीय आखाड्यात अधिकाऱ्यांकडून उमेदवारांना धमक्या दिल्या जात असल्याचा आरोप करत होते. यावर पालकमंत्री संजय शिरसाट यांनी त्यांना संबंधित व्यक्तींची नावे जाहीर करण्याचे आव्हान दिले होते. या आव्हानाला उत्तर देताना दानवे यांनी थेट डॉ. शिवाजी सुक्रे यांचे नाव घेतले. डॉक्टरांच्या वेशभूषेत राजकीय सौदेबाजी करत असल्याचा आणि उमेदवारांना फोन करत असल्याचा आरोप त्यांनी केला. दानवे यांनी निवडणूक आयोगाला पाठवलेल्या पत्रात म्हटले आहे की, डॉ. सुक्रे यांनी छत्रपती संभाजीनगर महानगरपालिका निवडणूक लढवणाऱ्या शिवसेना (उद्धव बाळासाहेब ठाकरे) पक्षाच्या उमेदवाराला फोन करून ‘कशाला पालकमंत्र्यांच्या नादी लागतोस, उमेदवारी मागे घेऊन टाक’ असे म्हटले आहे. ही बाब निवडणूक आचारसंहितेचे गंभीर उल्लंघन असल्याचे दानवे यांनी नमूद केले. पत्रात पुढे असेही म्हटले आहे की, डॉ. शिवाजी सुक्रे यांची अधिष्ठाता पदावरील नियुक्ती केवळ २२ जून २०२४ पर्यंतच वैध होती, तरीही ते अजूनही पदावर कायम आहेत. महाराष्ट्र प्रशासकीय न्यायाधिकरणाने (MAT) देखील त्यांच्या या ‘बेकायदेशीर नियुक्ती’ची दखल घेतली होती. पालकमंत्री संजय शिरसाट यांची बाजू घेऊन डॉ. सुक्रे पदावर कायम राहिल्याची परतफेड करत असल्याचा आरोप दानवे यांनी केला आहे. राज्य निवडणूक आयुक्तांकडे तक्रार दाखल या प्रकरणी दानवे यांनी राज्य निवडणूक आयुक्तांकडे तक्रार दाखल केली आहे. डॉ. शिवाजी सुक्रे यांच्यावर आचारसंहिता भंगाचा गुन्हा दाखल करून त्यांना तात्काळ निलंबित करण्याची मागणी त्यांनी केली आहे. कारवाई न झाल्यास शिवसेना (उद्धव बाळासाहेब ठाकरे) पक्ष निवडणूक आयोगाविरोधात रस्त्यावर उतरून आंदोलन करेल, असा इशाराही दानवे यांनी दिला आहे.
