बातमी ऐका (Marathi Voice Reader)
राष्ट्रीय स्वयंसेवक संघाच्या ‘कार्यकर्ता विकास वर्ग’ (द्वितीय वर्ष) चा समारोप समारंभ ४ जून रोजी नागपूर येथील रेशीमबाग येथील डॉ. हेडगेवार स्मृती भवन परिसरात होणार आहे. या कार्यक्रमासाठी आदित्य बिर्ला समूहाचे अध्यक्ष आणि पद्मभूषण सन्मानित उद्योगपती कुमारमंगलम बिर्ला हे मुख्य अतिथी म्हणून उपस्थित राहणार आहेत. सरसंघचालक डॉ. मोहन भागवत समारंभाचे मुख्य उद्बोधन करतील. ‘कार्यकर्ता विकास वर्ग’ (द्वितीय वर्ष) ११ मे पासून नागपूर येथे सुरू आहे. देशभरातील विविध प्रांतांमधून निवडलेले स्वयंसेवक या २५ दिवसांच्या सखोल प्रशिक्षण शिबिरात सहभागी झाले आहेत. स्वयंसेवकांना वैचारिक, शारीरिक आणि संघटनात्मक कौशल्यांचे प्रशिक्षण दिले जात आहे. कार्यकर्त्यांमध्ये नेतृत्व क्षमता, शिस्त आणि संघटन कौशल्य विकसित करणे हा या वर्गाचा मुख्य उद्देश आहे, असे संघाकडून सांगण्यात आले. मुख्य अतिथी कुमारमंगलम बिर्ला हे देशातील एक आघाडीचे उद्योगपती आहेत. त्यांचा जन्म १४ जून १९६७ रोजी झाला. त्यांनी मुंबई विद्यापीठातून बी.कॉम. आणि लंडन बिझनेस स्कूलमधून एमबीएचे शिक्षण पूर्ण केले आहे. ते चार्टर्ड अकाउंटंट देखील आहेत. वडील आदित्य विक्रम बिर्ला यांच्या निधनानंतर, वयाच्या अवघ्या २८ व्या वर्षी त्यांनी आदित्य बिर्ला समूहाची जबाबदारी स्वीकारली. त्यांच्या दूरदर्शी नेतृत्वाखाली समूहाचा व्यवसाय २ अब्ज डॉलर्सवरून ६५ अब्ज डॉलर्सपेक्षा अधिक वाढला आहे. हिंडाल्को, ग्रॅसिम, अल्ट्राटेक सिमेंट आणि व्होडाफोन-आयडिया या कंपन्यांनी त्यांच्या नेतृत्वाखाली जागतिक ओळख मिळवली आहे. उद्योग आणि सामाजिक क्षेत्रातील त्यांच्या उल्लेखनीय योगदानासाठी भारत सरकारने त्यांना २०२३ मध्ये ‘पद्मभूषण’ या देशातील तिसऱ्या सर्वोच्च नागरी सन्मानाने सन्मानित केले आहे. ते बिट्स पिलानीचे कुलपती आणि आयआयएम अहमदाबादचे माजी अध्यक्षही राहिले आहेत.
