आमदार संजयभाऊ देरकर यांच्या हस्ते विकासकामांचा दुहेरी सोहळा
सुरेश पाचभाई, मारेगाव
मारेगाव तालुक्यातील सगणापूर येथे आज दि. १६ जानेवारी रोजी वणी विधानसभा क्षेत्राचे आमदार मा. श्री. संजयभाऊ देरकर यांच्या शुभहस्ते गावातील नूतन सार्वजनिक वाचनालयाचे उद्घाटन व लोकार्पण तसेच ‘राष्ट्रीय ग्रामस्वराज अभियान’ अंतर्गत नव्या ग्रामपंचायत भवनाचे भूमिपूजन उत्साहात पार पडले.
या विकासकामांच्या दुहेरी सोहळ्यामुळे सगणापूर गावाच्या सर्वांगीण विकासाला चालना मिळणार असून ग्रामस्थांमध्ये आनंदाचे वातावरण पाहायला मिळाले. कार्यक्रमास मारेगाव पंचायत समितीचे गटविकास अधिकारी मा. श्री. भिमराव व्हनखंडे, कृषी विस्तार अधिकारी श्री. संदीप वाघमारे, सगणापूरचे सरपंच श्री. दादाराव टेकाम यांची प्रमुख उपस्थिती होती.
उद्घाटनप्रसंगी आमदार संजयभाऊ देरकर यांनी मार्गदर्शन करताना सांगितले की, “सार्वजनिक वाचनालयामुळे गावातील विद्यार्थ्यांना व तरुणांना ज्ञानसंपदेचा लाभ होईल. तर नवीन ग्रामपंचायत भवनामुळे प्रशासन अधिक सक्षम होऊन ग्रामविकासाला गती मिळेल. ग्रामीण भागाचा सर्वांगीण विकास साधणे हेच आमचे मुख्य उद्दिष्ट आहे.”
कार्यक्रमास उपसरपंच, ग्रामपंचायतीचे सर्व सदस्य, ग्रामसेवक, गावातील प्रतिष्ठित नागरिक व ग्रामस्थ मोठ्या संख्येने उपस्थित होते. सगणापूरच्या विकासासाठी महत्त्वपूर्ण ठरणाऱ्या या उपक्रमांचे ग्रामस्थांनी स्वागत करत समाधान व्यक्त केले.
