तालुका प्रतिनिधी कळंब : रितेश क्षिरसागर
स्थानिक कळंब येथील शिवशक्ती उच्च प्राथमिक शाळेत विद्यार्थ्यांच्या व्यवहारज्ञानाला चालना देण्याच्या उद्देशाने आयोजित करण्यात आलेला भव्य आनंदमेळावा उत्साहात संपन्न झाला.शिवशक्ती शिक्षण संस्थेचे व्यवस्थापक प्रा. रविशंकर ऊर्फ बाळासाहेब धांदे यांच्या अध्यक्षतेखाली कळंब नगरपंचायतेचे बांधकाम सभापती चंद्रशेखर चांदोरे यांच्या हस्ते आनंदमेळाव्याचे उद्घाटन करण्यात आले.
यावेळी राळेगाव केमिस्ट अँड ड्रगिस्ट असोसिएशनचे तालुकाध्यक्ष विनय मुनोत व गजानन अक्कलवार हे प्रमुख पाहुणे म्हणून उपस्थित होते. शाळेचे मुख्याध्यापक अशीच महाजन हे कार्यक्रमाचे संयोजक होते.कार्यक्रमाची सुरुवात प्रतिमेचे पूजन व दीपप्रज्वलनाने झाली. उद्घाटक चंद्रशेखर चांदोरे यांनी आपल्या भाषणात सध्याच्या स्पर्धात्मक युगात विद्यार्थ्यांनी व्यावसायिक व व्यवहारिक ज्ञान आत्मसात करणे अत्यंत आवश्यक असल्याचे सांगितले.
नोकऱ्यांची मर्यादा लक्षात घेता बालवयापासूनच व्यवहारज्ञान विकसित करणारे उपक्रम विद्यार्थ्यांच्या सर्वांगीण विकासासाठी उपयुक्त ठरतात, असे त्यांनी नमूद केले.अध्यक्षीय मनोगतात प्रा. बाळासाहेब धांदे यांनी आनंदमेळावा हा केवळ खाद्यपदार्थांचा उत्सव नसून विद्यार्थ्यांना व्यवहारातील बारकावे समजावून देणारे प्रभावी व्यासपीठ असल्याचे सांगितले. अशा उपक्रमांमुळे विद्यार्थी आत्मनिर्भर बनून भविष्यातील आव्हानांना सक्षमपणे सामोरे जाऊ शकतात, असे ते म्हणाले.
कार्यक्रमाचे सूत्रसंचालन प्रवीण देशमुख यांनी केले, तर आभार प्रदर्शन मयूर होले यांनी केले. कार्यक्रमाच्या यशस्वीतेसाठी कु. शालू सदाफळे, कु. चंद्रभागा मेश्राम, सौ. प्रांजली दरणे, शिवम चांदोरे, विठ्ठल राठोड व देवानंद चांदोरे यांनी विशेष परिश्रम घेतले.