शासनमान्यता नसलेल्या एचटीबीटी कपाशीच्या बियाण्यांची साठवणूक करून ती शेतकऱ्यांना अधिक दराने विक्री करणाऱ्या अंबाडा येथील एकावर कृषी विभाग आणि मोर्शी पोलिसांनी संयुक्त कारवाई केली. या कारवाईत ८६ बियाण्यांची पाकिटे जप्त करण्यात आली असून, सुमारे १ लाख ३९ हजार ७५० रुपयांचा मुद्देमाल हस्तगत करण्यात आला. ही कारवाई २६ जूनला सायंकाळी करण्यात आली. मोर्शी पोलिस ठाण्याच्या हद्दीतील अंबाडा येथे एचटीबीटी कपाशीच्या बियाण्यांची अवैध विक्री होत असल्याची गोपनीय माहिती मोर्शी पंचायत समितीचे कृषी अधिकारी राहुल चौधरी यांना मिळाली होती. त्यानुसार त्यांनी मोर्शीचे ठाणेदार राहुल आठवले यांच्याकडे पोलिस मदतीची मागणी केली. यानंतर तालुका कृषी अधिकारी तथा गुणनियंत्रण निरीक्षक दिनेश चौधरी, सहाय्यक कृषी अधिकारी मनीष काळे, मनोज लंगोटे तसेच अंबाडा बीटचे मंगेश बदुकले यांनी संयुक्तपणे मोहम्मद अफजल जाफर खान अहमदखान (रा. अंबाडा) यांच्या घरावर छापा टाकला. झडतीदरम्यान घरातून एकूण ८६ एचटीबिटी बियाण्यांची पाकिटे आढळून आली. ही सर्व पाकिटे जप्त करण्यात आली. तालुका कृषी अधिकारी दिनेश चौधरी यांच्या तक्रारीवरून मोहम्मद अफजल जाफर खान अहमद खानविरुद्ध विविध कलमान्वये गुन्हा दाखल करण्यात आला आहे. चौकशीदरम्यान आरोपीकडे बियाणे साठवणुकीचा कोणताही अधिकृत परवाना नसल्याचे निष्पन्न झाले. तसेच ही एचटीबीटी बियाण्यांची पाकिटे परिसरातील शेतकऱ्यांना विक्री करण्यासाठी आणल्याची कबुली आरोपीने दिली असल्याची माहिती पोलिसांनी दिली.
