परळी नगरपालिकेतील भ्रष्टाचाचाराची चौकशी करावी या मागणीसाठी गत सहा दिवसांपासून नगरपालिका कार्यालयासमोर उपोषणाला बसलेल्या वैजनाथ सुरवसे यांनी प्रजासत्ताकदिनी नगरपालिका इमारतीवरुन आत्महत्येचा प्रयत्न केला. तब्बल दीड तास चाललेला हा हायव्होल्टेज ड्रामा पोलिसांनी सुरवसे यांना ताब्यात घेतल्यानंतर थांबला. परळी नगरपरिषदेत २००१ ते २०२६ या कालावधीत २ हजार कोटींचा भ्रष्टाचार झाला. हा भ्रष्टाचार करणाऱ्या प्रशासकीय अधिकाऱ्यांची सीबीआय चौकशी करुन कारवाई करावी, या मागणीसाठी वैजनाथ सुरवसे मागील 6 दिवसांपासून नगरपालिका कार्यालयापुढे उपोषणाला बसले होते. पण अधिकाऱ्यांनी त्यांच्याकडे दुर्लक्ष केले होते. अखेर आज प्रजासत्ताकदिनी त्यांनी इमारतीच्या छतावर चढून तेथून उडी मारण्याचा प्रयत्न केला. या अनपेक्षित घटनेमुळे पोलिस अधिकाऱ्यांची एकच धावपळ उडाली. पोलिसांनी सुरवसे यांना शांत करण्याचा प्रयत्न केला. पण त्यांनी आपला एक पाय इमारती खाली व एक पाय छतावर ठेवत तेथून उडी मारण्याचा इशारा दिला. यामुळे अधिकाऱ्यांना आहे त्याच ठिकाणी थांबावे लागले. फेसबुक लाईव्ह करत उडी मारण्याचा प्रयत्न या घटनेचा एक व्हिडिओ सोशल मीडियावर व्हायरल झाला आहे. स्वतः वैजनाथ सुरवसे यांनी फेसबुक लाईव्हद्वारे तो व्हायरल केला आहे. त्यांच्या मते, परळी नगरपालिकेत गत २५ वर्षात भक्ती एंटप्रायजेस या बोगस कंत्राटादाराने २ हजार कोटी रुपयांपेक्षा अधिक भ्रष्टाचार केला आहे. यामध्ये सहभागी असलेल्या मुख्याधिकारी त्र्यंबक कांबळे, संतोष रोडे, आशिषकुमार अनिलकुमार दीक्षित, बापू नरवडे आणि संबंधीत १५ प्रशासकीय अधिकाऱ्यांची सीबीआय चौकशी करण्यात यावी. त्यांना निलंबित करण्यात यावे. या मागणीसाठी त्यांनी मागील २१ जानेवारीपासून आमरण उपोषण सुरु केले आहे. अधिकारी जवळ जाताच उडी मारण्याचा इशारा सोमवार दि. २६ जानेवारी रोजी नगराध्यक्षा पद्मश्री धर्माधिकारी यांच्या हस्ते ध्वाजारोहण झाल्यानंतर दुपारी १२ च्या सुमारास सुरवसे यांनी नगरपालिका इमारतीच्या तिसऱ्या मजल्यावरील छतावर चढत फेसबुक लाईव्ह करत उडी मारुन आत्महत्या करण्याचा इशारा दिला. हा प्रकार नगरपालिका प्रशासनाच्या लक्षात आल्यानंतर त्यास खाली येण्याच्या सुचना केल्या. परंतु कर्मचारी व नागरीक त्याच्या जवळ जाताच तो उडी मारण्याचा प्रयत्न करत होता. त्यामुळे आत्महत्येचा हा ड्रामा दुपारी दीड वाजेपर्यंत सुरु होता. अखेर पोलिसांनी त्यास पकडून ताब्यात घेतले.
