बातमी ऐका (Marathi Voice Reader)
जालना: जालना शहरात जीम ट्रेनरची चाकूने वार करून हत्या करण्यात आल्याची घटना काल सकाळच्या सुमारास घडलीये. ३० वर्षीय राहुल राजपूत असे हत्या करण्यात आलेल्या जीम ट्रेनरचे नाव आहे. शहरातील लोधी मोहल्ला भागात ही घटना घडली आहे. या प्रकरणी पोलिसांनी तात्काळ कारवाई करत दोघांना ताब्यात घेतले आहे.
पोलिसांनी ताब्यात घेतलेल्या दोन आरोपींमध्ये एक अल्पवयीन असून दुसऱ्या आरोपीचे नाव श्रेयस पवार आहे. दोन्हीही आरोपी जालना शहरातील विद्युत कॉलनीतील रहिवासी आहे. पाच हजार रुपये देऊनही प्रोटीन दिले नसल्यामुळे ही हत्या झाल्याची माहिती पोलिसांनी दिली आहे.
दुचाकीवरून तरुण आले, चाकूने वार करून पळून गेले
जीम ट्रेनर असलेला राहुल राजपूत शुक्रवार रोजी सकाळी लोधी मोहल्ला भागात होता. यावेळी दोन तरूणांनी दुचाकीवर घेऊन त्याच्यावर चाकूने वार केले. यावेळी नागरिकांसह कुटुंबियांनी त्याला उपचारासाठी जिल्हा रुग्णालयात दाखल केलं मात्र डॉक्टरांनी, त्याला तपासून मृत घोषित केलं.
पोलिसांनी दोन संशयितांना ताब्यात घेतले, एक अल्पवयीन
यानंतर काही तासातच पोलिसांनी दोन संशयितांना ताब्यात घेतले. यातील एक अल्पवयीन असून तर दुसरा श्रेयस पवार आहे हे दोन्हीही संशयित आरोपी जालना शहरातील विद्युत कॉलनी भागातील रहिवासी आहेत दरम्यान पोलीस या प्रकरणी अधिक तपास करत आहेत.
