अजित पवारांविरोधात मी जिवापाड लढले, जन्मभर लढले असते:पण हे खूप खूप चुकीचे घडले; अंजली दमानियांची भावनिक प्रतिक्रिया

राज्यात उपमुख्यमंत्री अजित पवार यांच्या संदर्भात समोर आलेल्या अपघाताच्या वृत्तांनी राजकीय आणि सामाजिक वर्तुळात मोठी अस्वस्थता निर्माण केली आहे. या घडामोडींनंतर अनेक नेते, कार्यकर्ते आणि सामाजिक क्षेत्रातील व्यक्तींनी आपल्या भावना व्यक्त केल्या आहेत. विशेष म्हणजे अजित पवार यांच्याविरोधात सातत्याने संघर्ष करणाऱ्या सामाजिक कार्यकर्त्या अंजली दमानिया यांनी दिलेली भावनिक प्रतिक्रिया सध्या चर्चेचा केंद्रबिंदू ठरत आहे. राजकीय मतभेद असले तरी मानवी नातेसंबंध आणि संवेदना यापलीकडे काहीच नसते, हेच त्यांच्या प्रतिक्रियेतून पुन्हा एकदा अधोरेखित झाले आहे. अंजली दमानिया यांनी प्रतिक्रिया देताना स्पष्ट शब्दांत सांगितले की, डोकं सुन्न झालं आहे. विश्वासच बसत नाही. त्यांनी पुढे सांगितले की अजित पवार यांच्या विरोधात त्यांनी वैचारिक आणि सार्वजनिक पातळीवर जीवापाड संघर्ष केला आहे आणि तो संघर्ष आयुष्यभर सुरू ठेवण्याची त्यांची तयारी होती. मात्र, अपघाताच्या या बातम्यांनी मनाला जबर धक्का दिला असून, राजकारण बाजूला पडून माणूस म्हणून मन हादरल्याची भावना त्यांनी व्यक्त केली. मी विरोध केला, प्रश्न विचारले, आंदोलन केली; पण हे घडणं खूप चुकीचं आहे, असे म्हणत दमानिया यांनी कोणताही राजकीय अभिनिवेश न ठेवता आपली भूमिका मांडली. त्यांच्या मते, लोकशाहीत विरोध हा आवश्यकच असतो, पण अचानक समोर येणाऱ्या अशा घटनांनी सर्वच समीकरणे बदलून जातात. त्यांनी व्यक्त केलेला धक्का इतका तीव्र होता की, हे स्वीकारणंच शक्य होत नाही. दरम्यान, या अपघाताच्या वृत्तांमुळे राज्यातील राजकीय वातावरण काही काळासाठी स्तब्ध झालेले दिसत आहे. अजित पवार हे जिल्हा परिषद आणि पंचायत समिती निवडणूक प्रचारासाठी बारामतीमध्ये सभा घेणार होते, अशी माहिती आधीच समोर आली होती. त्यामुळे या दौऱ्याशी संबंधित घडामोडींना अधिक महत्त्व प्राप्त झाले आहे. मी त्यांच्याशी सहमत नव्हते, पण माणूस म्हणून मनाला मोठा धक्का बसला आहे, असे सांगत त्यांनी राजकीय विरोध आणि वैयक्तिक संवेदना यामधील फरक अधोरेखित केला. दमानिया यांनी केलेली पोस्ट देखील पहा…. डोकं खूप खूप सुन्न झाला ऐकून !
विश्वासच बसत नाही.
अजित पवारांविरोधात मी जिवापाड लढले आणि ते जन्मभर लढले असते. पण हे खूप खूप चुकीचे घडले.
पण हे… हे इतकं धक्कादायक आहे की स्वीकारणंच शक्य होत नाही.
खूप धक्का बसला आहे…… खूप