गडचिरोली येथे 12 व्या आंतरराष्ट्रीय योग दिनानिमित्त गडचिरोली पोलिस दलातर्फे सामूहिक योग शिबिराचे आयोजन करण्यात आले. पोलिस मुख्यालय येथे सकाळी 6 वाजता सुरू झालेल्या या शिबिरात 700 हून अधिक पोलिस अधिकारी व अंमलदारांनी सहभाग घेतला. भारतीय प्राचीन संस्कृती आणि परंपरेत योगाला अनन्यसाधारण महत्त्व आहे. आजच्या धकाधकीच्या जीवनात शरीर तंदुरुस्त, सशक्त आणि मन प्रफुल्लित ठेवण्याच्या उद्देशाने हे शिबिर आयोजित करण्यात आले होते. पोलिस अधीक्षक एम. रमेश यांच्यासह अनेक वरिष्ठ अधिकाऱ्यांनी मुख्य शिबिरात योगासने केली. मुख्य शिबिरासोबतच जिल्ह्यातील सर्व उपविभागीय पोलिस अधिकारी कार्यालये, पोलिस उप-मुख्यालय, प्राणहिता, तसेच सर्व पोलिस स्टेशन, उपपोलिस स्टेशन आणि पोलिस मदत केंद्रांवरही एकाच वेळी सामूहिक योग शिबिरे उत्साहात पार पडली. प्राणहिता येथील शिबिरात सीआरपीएफ आणि विशेष अभियान पथकाचे जवळपास 500 जवान उपस्थित होते. याप्रसंगी योग प्रशिक्षक मिलिंद उमरे आणि श्रीमती अंजली कुळमेथे यांनी उपस्थितांना योगाचे विविध प्रकार शिकवले आणि त्याचे महत्त्व पटवून दिले. शरीर व मन सक्षम ठेवण्यासाठी कोणती योगासने करावीत, याचे प्रात्यक्षिकांसह मार्गदर्शन त्यांनी केले.
पोलिस अधीक्षक एम. रमेश यांनी सर्वांना आपल्या दैनंदिन जीवनशैलीत व्यायामाला स्थान देऊन रोज किमान 20 मिनिटे योगासाठी वेळ देण्याचे आवाहन केले. या शिबिराच्या यशस्वीतेसाठी पोलिस मुख्यालयाचे रापोनि अनुजकुमार मडामे, पोलिस कल्याण शाखेचे प्रभारी अधिकारी नरेंद्र पिवाल यांच्यासह सर्व शाखांच्या प्रभारींनी परिश्रम घेतले.