राज-उद्धव ठाकरेंबद्दल अपशब्द:सोशल मीडियावर नसती उठाठेव; नालासोपाऱ्यातल्या तरुणाची मनसे-शिवसेना कार्यकर्त्यांनी काढली धिंड

सोशल मीडियावर राजकीय नेत्यांबद्दल आक्षेपार्ह आणि अपमानास्पद भाषा वापरणे एका तरुणाला चांगलेच महागात पडल्याची खळबळजनक घटना नालासोपारा परिसरात समोर आली आहे. उद्धव ठाकरे आणि राज ठाकरे यांच्याबद्दल एकेरी उल्लेख करत अत्यंत खालच्या पातळीवर जाऊन अपशब्द वापरून पोस्ट करणाऱ्या तरुणाला महाराष्ट्र नवनिर्माण सेनेच्या कार्यकर्त्यांनी चोप दिला. या घटनेत संबंधित तरुणाला बेदम मारहाण करण्यात आली असून, त्याची अर्धनग्न अवस्थेत परिसरात धिंड काढण्यात आल्याचे पाहायला मिळाले. या घटनेचा व्हिडिओ सध्या सोशल मीडियावर मोठ्या प्रमाणात व्हायरल होत असून, त्यामुळे राजकीय वर्तुळात आणि नागरिकांमध्येही चर्चेला उधाण आले आहे. मिळालेल्या माहितीनुसार, सूरज महेंद्र शिर्के असे या तरुणाचे नाव असून, तो गेल्या काही दिवसांपासून फेसबुक आणि इतर सोशल मीडिया प्लॅटफॉर्मवर सातत्याने राजकीय नेत्यांविरोधात आक्षेपार्ह पोस्ट करत होता. विशेषतः मनसे अध्यक्ष राज ठाकरे, शिवसेना उद्धव बाळासाहेब ठाकरे पक्षाचे प्रमुख उद्धव ठाकरे आणि आमदार आदित्य ठाकरे यांच्याबद्दल त्याने अत्यंत खालच्या पातळीवर जाऊन टीका केली होती. या पोस्टमधून त्याने एकाच नेत्याला मान्य असल्याचे सांगत इतर नेत्यांवर चोर असल्याचे आरोप केले होते. या पोस्टमुळे मनसे आणि शिवसेना ठाकरे गटाच्या कार्यकर्त्यांमध्ये तीव्र संतापाची भावना निर्माण झाली होती. या तरुणाच्या पोस्ट सोशल मीडियावर मोठ्या प्रमाणात पसरल्यानंतर कार्यकर्त्यांमध्ये असंतोष वाढत गेला. राज ठाकरे आणि उद्धव ठाकरे यांच्याबद्दल वापरलेली भाषा अत्यंत अश्लील आणि अपमानास्पद असल्याचा आरोप कार्यकर्त्यांनी केला. काही पोस्टमध्ये राज ठाकरे यांच्या भूमिकांवर टीका करताना अपमानजनक शब्द वापरण्यात आले होते, तर उद्धव ठाकरे यांच्याबद्दलही अत्यंत अवमानकारक उल्लेख करण्यात आला होता. या प्रकारामुळे ठाकरे कुटुंबीयांचे समर्थक एकत्र आले आणि या तरुणावर कारवाई करण्याची मागणी जोर धरू लागली. दरम्यान, मनसेचे उपविभाग अध्यक्ष किरण नकाशे आणि त्यांच्या सहकाऱ्यांना संबंधित तरुण नालासोपारा परिसरात लपून बसल्याची माहिती मिळाली. माहिती मिळताच मनसे आणि शिवसेनेच्या काही कार्यकर्त्यांनी तात्काळ त्या ठिकाणी धाव घेतली. कार्यकर्त्यांनी तरुणाला पकडून त्याचा चोप दिला. इतक्यावरच न थांबता, त्याला अर्धनग्न करून रस्त्यावरून सुमारे दीड किलोमीटरपर्यंत फिरवण्यात आले. या घटनेदरम्यान काही नागरिकांनी मोबाईलवर व्हिडिओ शूट केला, जो नंतर सोशल मीडियावर वेगाने व्हायरल झाला. या प्रकारामुळे नालासोपारा परिसरात काही काळ तणावाचे वातावरण निर्माण झाले होते. रस्त्यावर घडलेल्या या घटनेमुळे नागरिकांमध्ये भीतीचे वातावरण पसरले होते. काही ठिकाणी गर्दी जमली होती, तर काही नागरिकांनी या प्रकारावर नाराजी व्यक्त केली. सोशल मीडियावर व्हायरल झालेल्या व्हिडिओमुळे या घटनेची चर्चा राज्यभर पसरली आहे. अनेकांनी या प्रकाराला कायद्याच्या चौकटीबाहेरील कारवाई असल्याचे म्हटले, तर काहींनी सोशल मीडियावरील मर्यादा ओलांडणाऱ्या पोस्टविरोधात संतप्त प्रतिक्रिया व्यक्त केल्या. मर्यादा ओलांडल्यास याच पद्धतीने उत्तर या घटनेनंतर मनसे पदाधिकारी किरण नकाशे यांनी सोशल मीडियावर पोस्ट करत आपली भूमिका स्पष्ट केली. त्यांनी लिहिले की, राज ठाकरे आणि उद्धव ठाकरे यांच्याबद्दल अश्लील आणि अपमानास्पद भाषा वापरणाऱ्या या तरुणाचा आम्ही शोध घेत होतो. तो मराठी असो किंवा अमराठी, आमच्या दैवतांबद्दल बोलताना कोणीही मर्यादा ओलांडल्यास त्याला याच पद्धतीने उत्तर दिले जाईल, असा इशारा त्यांनी दिला. या भाषेतच अशा लोकांना समजते, असेही त्यांनी आपल्या पोस्टमध्ये नमूद केले आहे.