लोकसभेत झालेल्या गोंधळानंतर निलंबित करण्यात आलेले भंडारा-गोंदियाचे काँग्रेस खासदार डॉ. प्रशांत पडोळे यांनी केंद्र सरकारवर जोरदार टीका केली आहे. “निलंबन हा माझ्यासाठी छोटा मुद्दा असून, जनतेच्या प्रश्नांवर आवाज उठवल्याप्रकरणी मला फासावर चढवलं तरी मी तयार आहे,” अशा शब्दांत त्यांनी आपला निर्धार व्यक्त केला. लोकसभा अध्यक्षांच्या दिशेने कागद भिरकावल्याचा आणि कामकाजात अडथळा आणल्याचा ठपका ठेवत महाराष्ट्रातील डॉ. पडोळे यांच्यासह आठ खासदारांचे निलंबन करण्यात आले आहे. या कारवाईनंतर भंडाऱ्यात पोहोचल्यावर त्यांनी माध्यमांशी संवाद साधला. डॉ. पडोळे म्हणाले की, “सभागृहात भाजपचे नेते अनेकदा ‘अनपार्लमेंटरी’ (असंसदीय) शब्दांचा वापर करतात. त्यांचा रेकॉर्ड तपासावा, मात्र त्यांच्यावर कधीही कारवाई होत नाही. पण जेव्हा आम्ही जनतेचे प्रश्न मांडतो, तेव्हा आमचा आवाज दाबला जातो”. राहुल गांधी यांनी देशाच्या सुरक्षेबाबत उपस्थित केलेल्या महत्त्वाच्या मुद्द्यांवर चर्चा करण्याऐवजी सरकार पळ काढत आहे. “सत्य मांडायला सरकार का घाबरते?” असा सवाल त्यांनी उपस्थित केला. निलंबनामुळे डगमगून न जाता, जनतेच्या हक्कासाठी सभागृहात आणि रस्त्यावरही संघर्ष सुरूच ठेवणार असल्याचे त्यांनी स्पष्ट केले. सभागृहातील लोकशाहीची गळचेपी आता जनताच उघड्या डोळ्यांनी पाहत असून, विरोधकांचा आवाज दडपण्याचे प्रयत्न यशस्वी होणार नाहीत, असा इशाराही त्यांनी यावेळी दिला.
जनतेसाठी फासावर चढण्याची तयारी:काँग्रेस खासदार प्रशांत पडोळे यांचा भाजपवर घणाघात; निलंबनाच्या कारवाईवर संतापले
Ad Banner
Show Comments (0)
Hide Comments (0)
Subscribe
Login
0 Comments
Oldest
