शाळा, महाविद्यालयातील विद्यार्थीनींची छेड काढण्याचे प्रकार होत असल्यास तातडीने नजीकच्या पोलिस ठाण्याशी किंवा दामिनी पथकाशी संपर्क करण्याचे आवाहन दामिनी पथकाच्या सहाय्यक पोलिस निरीक्षक प्रेमलता जगताप यांनी केले आहे. आखाडा बाळापूर (ता.कळमनुरी) येथील दोन महाविद्यालयातील विद्यार्थीनींशी त्यांनी संवाद साधला. यावेळी जमादार सीमा पाटील, वर्षा शिंदे, आरती साळवे, रवीना घुमनर, हिंमतराव सरनाईक यांची उपस्थिती होती. यावेळी सहाय्यक पोलिस निरीक्षक जगताप यांनी आखाडा बाळापूर येथील राजर्षी शाहूी महाविद्यालयातील विद्यार्थीनींशी संवाद साधला. यावेळी त्यांनी विद्यार्थीनींच्या अडचणी जाणून घेतल्या. शाळा, महाविद्यालय गावापासून काही अंतरावर असल्याचा गैरफायदा टारगट मुलांकडून घेतला जाण्याची शक्यता नाकारता येत नाही. विद्यार्थीनींना निर्भयपणे शाळा, महाविद्यालयात जाऊन शिक्षण घेता यावे यासाठी पोलिस अधिक्षक निलाभ रोहन, अप्पर पोलिस अधिक्षक कमलेश मीना यांच्या मार्गदर्शनाखाली दामीनी पथक स्थापन केले आहे. या पथकाकडून शाळा, महाविद्यालय तसेच बसस्थानक, रेल्वेस्थानकावर भेट देऊन पाहणी करीत असल्याचे त्यांनी स्पष्ट केले. शाळा, महाविद्यालयातील विद्यार्थीनींनी देखील छेडछाडीचे प्रकार होत असल्यास न घाबरता तक्रार देण्यासाठी पुढे यावे. तक्रार देणाऱ्या विद्यार्थीनींचे नांव गोपनिय ठेवले जाईल असे आश्वासन त्यांनी विद्यार्थीनींना दिले. या शिवाय ११२ हा क्रमांक २४ तास सक्रिय असून या क्रमांकावरही तक्रार देता येणार असल्याचे त्यांनी स्पष्ट केले. यावेळी त्यांनी राजर्षी शाहू विद्यालय व कनिष्ठ महाविद्यालय तसेच नारायणराव वाघमारे महाविद्यालयातील प्राचार्यांची भेट घेऊन त्यांच्याशी संवाद साधला. विद्यार्थीनींच्या सुरक्षेसाठी पोलिस यंत्रणा सज्ज आहेच पण शाळा, महाविद्यालयांनी देखील योग्य ती खबरदारी घेतली पाहिजे असे त्यांनी यावेळी सांगितले.
