शहरातील मध्यवर्ती भाग असलेल्या महाल येथील कोठी रोड परिसरात रविवारी मध्यरात्री दोन गटांमध्ये वर्चस्वाच्या वादातून गोळीबार झाल्याची धक्कादायक घटना घडली आहे. तीन वेगवेगळ्या दुचाकींवरून आलेल्या सहा जणांनी परिसरात दहशत निर्माण करण्यासाठी दोन राऊंड गोळीबार केला. शहर शांततेत झोपलेले असताना अचानक झालेल्या या गोळीबारामुळे महाल आणि कोठी रोड परिसरात भीतीचे वातावरण पसरले आहे. ही घटना राष्ट्रीय स्वयंसेवक संघाच्या मुख्यालयापासून अवघ्या दीड किलोमीटर अंतरावर घडल्याने पोलीस प्रशासनात मोठी खळबळ उडाली आहे. मिळालेल्या प्राथमिक माहितीनुसार, ही घटना रविवारी रात्री साडेअकरा ते बारा वाजेच्या सुमारास घडली. जुन्या वादातून आणि परिसरात स्वतःचे वर्चस्व तसेच दहशत प्रस्थापित करण्यासाठी हा गोळीबार करण्यात आल्याचा पोलिसांचा संशय आहे. या प्रकरणी सौरभ नावाच्या तरुणाने कोतवाली पोलीस ठाण्यात फिर्याद दिली असून, संशयित आरोपी रवी मोहतो आणि गंगा काकडे यांनी हे फायरिंग केल्याचा आरोप केला आहे. पोलिसांनी दिलेल्या माहितीनुसार, गोळीबार करणारे संशयित आरोपी गुन्हेगारी पार्श्वभूमीचे आहेत. त्यांच्यावर यापूर्वी अमली पदार्थ (ड्रग्ज) विक्री आणि बाळगल्याप्रकारचे गंभीर गुन्हे दाखल आहेत. अंतर्गत टोळीयुद्ध किंवा अमली पदार्थांच्या व्यवसायातील वर्चस्वाच्या वादातूनच हा थरार घडल्याचा अंदाज व्यक्त होत आहे. घटनेची माहिती मिळताच कोतवाली पोलिसांनी तातडीने घटनास्थळ गाठून तपास सुरू केला आहे. पोलिसांनी या प्रकरणात तात्काळ कारवाई करत ६ आरोपींना ताब्यात घेतले असून फरार संशयितांचा शोध सुरू केला आहे. परिसरातील सीसीटीव्ही फुटेज तपासले जात असून कोतवाली पोलीस या गुन्ह्याचा पुढील सखोल तपास करत आहेत.
