ठाण्यातील डावखरे कुटुंबात मोठी फूट:भाजप नेते निरंजन डावखरे यांच्या भावाचा राष्ट्रवादीत प्रवेश; तटकरे, वळसे, भुजबळांनी केले स्वागत

भाजप नेते निरंजन डावखरे यांचे मोठे बंधू प्रबोध डावखरे यांनी आज उपमुख्यमंत्री सुनेत्रा पवार यांच्या नेतृत्वातील सत्ताधारी राष्ट्रवादी काँग्रेसमध्ये प्रवेश केला. राष्ट्रवादीचे प्रदेशाध्यक्ष सुनील तटकरे यांनी त्यांचे स्वागत केले. या पक्ष प्रवेशामुळे राजकारणातील एक प्रमुख कुटुंब असणाऱ्या डावखरे कुटुंबात मोठी फूट पडल्याचे स्पष्ट झाले आहे. राष्ट्रवादी काँग्रेसचे दिवंगत नेते वसंत डावखरे यांच्या निधनानंतर त्यांचे सुपुत्र निरंजन डावखरे यांनी भाजपमध्ये प्रवेश केला होता. तेव्हापासून हे कुटुंब राजकीयदृष्ट्या एकजूट होते. पण आज निरंजन डावखरे यांचे बंधू प्रबोध डावखरे यांनी सत्ताधारी राष्ट्रवादी काँग्रेसमध्ये प्रवेश केला. राष्ट्रवादीचे प्रदेशाध्यक्ष सुनील तटकरे, ज्येष्ठ नेते दिलीप वळसे पाटील व मंत्री छगन भुजबळ यांनी त्यांचे पक्षात स्वागत केले. प्रबोध यांनी यावेळी आपण आपल्या वडिलांचा वारसा पुढे नेण्याचा प्रयत्न करणार असल्याची भावना व्यक्त केली. आज माझ्या जीवनातील एक महत्त्वाचा दिवस आहे. माझ्या वडिलांनी आयुष्यभर ज्या पक्षासाठी कष्ट केले, त्या पक्षात आज मी प्रवेश केला. माझ्या वडिलांनी रुग्णालयात असताना सांगितले होते, ज्यावेळी तुला राजकारणात जावे वाटेल, तेव्हा राष्ट्रवादीत जा. त्यानुसार आज मी राष्ट्रवादीत काँग्रेसमध्ये प्रवेश केला. माझ्या वडिलांनी ठाण्यात राष्ट्रवादी काँग्रेस पक्ष वाढवला. मी त्यांचा वारसा पुढे नेण्याचा प्रयत्न करेन, असे प्रबोध डावखरे म्हणाले. प्रबोध यांना पक्षात चांगली वागणूक मिळेल – भुजबळ छगन भुजबळ यावेळी बोलताना म्हणाले, आम्ही पक्ष वाढीसाठी सातत्याने प्रयत्न करत असतो. वसंत डावखरे अजातशत्रू होते. त्यांच्यात कुठेही शत्रूत्वाची भावना नव्हती. त्यांचे चिरंजीव प्रबोध डावखरे यांनी आज आपल्या पक्षात प्रवेश केला. प्रबोध एक उत्तम व्यावसायिक आहेत. त्यांच्या अनेक जिम आहेत. आता ते आपल्यासोबत येत आहेत. त्यांना या पक्षात खूप चांगली वागणूक मिळेल. कुठेही कमी जास्त अशी वागणूक असणार नाही. ते पक्षासाठी मजबुतीने काम करतील. काम करताना काही अडचणी आल्या तर त्या सांगत चला, असे ते म्हणाले. पक्षाची संघटना मजबूत करण्याचे काम करणार दिलीप वळसे पाटील यांनीही यावेळी प्रबोध डावखरे यांचे स्वागत केले. ते म्हणाले, पक्षाच्या राष्ट्रीय अध्यक्षा सुनेत्रा पवार यांच्यातर्फे आम्ही प्रबोध डावखरे यांचे पक्षात स्वागत करतो. प्रबोध एक चांगले व्यावसायिक आहेत. ते राज्याच्या विविध भागांत जवळपास 30 जिम चालवतात. त्यंच्या वडिलांच्या विचारांचा धागा पडकून ते आता पुढे जात आहेत. वसंत डावखरे यांचे हिवरे गाव शिरूर तालुक्यात आहे. तत्कालीन मंत्री बाळासाहेब देसाई यांचे स्वीय सहाय्यक म्हणूनही त्यांनी काम केले होते. विधान परिषदेचे उपसभापती म्हणूनही काम केले. ठाण्यात डावखरे यांना मानणारा एक मोठा वर्ग आहे. प्रबोध हे पक्षाची संघटना मजबूत करण्याचे काम करतील.