बातमी ऐका (Marathi Voice Reader)
वसमत तालुक्यातील चिखली शिवारात दुचाकीस्वाराच्या तपासणीमध्ये एक गावठी पिस्टल व दोन जिवंत काडतूस सापडले असून या प्रकरणी हट्टा पोलिस ठाण्यात मंगळवारी ता. 19 रात्री गुन्हा दाखल झाला आहे. पोलिसांनी एकास ताब्यात घेतले आहे. पोलिसांनी दिलेल्या माहितीनुसार, परभणी जिल्हयातील मानवत येथील सुरजितसिंह टाक (26) हा नांदेड येथून दुचाकी वाहनावर परभणीकडे जात असून त्याच्या कपड्याच्या पिशवीमध्ये गावठी पिस्टल व जिवंत काडतूस असल्याची माहिती हट्टा पोलिसांना मिळाली होती. त्यावरून सहाय्यक पोलिस निरीक्षक संग्राम जाधव, उपनिरीक्षक शेख, माणिक सिरसेवाड, जमादार किरण, धोतरे, गणेश सुर्यवंशी, संदीप सुरुशे, कृष्णा चव्हाण, हिरामण चव्हाण यांच्या पथकाने मंगळवारी सायंकाळी चिखली शिवारात वाहनांची तपासणी सुरु केली होती. यावेळी सायंकाळच्या सुमारास पोलिसांनी एक दुचाकी वाहन थांबविले. यावेळी दुचाकीस्वार सुरजितसिंग याची चौकशी केली असता त्याने सुरवातीला उडवा उडवीची उत्तरे दिली त्यानंतर पोलिसांनी त्याच्या जवळील पिशवीची तपासणी केली असता त्यात कपड्यांच्या खालच्या बाजूला एक गावठी पिस्टल व दोन जिवंत काडतूस आढळून आले. पोलिसांनी पिस्टल व काडतूस व दुचाकी वाहन असा सुमारे 70 हजाराचा मुद्देमाल जप्त केला आहे. या प्रकरणी सहाय्यक पोलिस निरीक्षक जाधव यांच्या तक्रारीवरून हट्टा पोलिस ठाण्यात सुरजितसिंग टाक (रा. फुलेनगर, मानवत) याच्या विरुध्द गुन्हा दाखल केला आहे. पोलिस उपनिरीक्षक शेख पुढील तपास करीत आहेत. सुरजितसिंग याने गावठी पिस्टल व काडतूस कोठून खरेदी केले याचा पोलिसांनी तपास चालविला आहे.
