बातमी ऐका (Marathi Voice Reader)
गडचिरोली जिल्ह्यात गुरुवारी सकाळी झालेल्या भीषण एसटी अपघाताने संपूर्ण परिसर हादरून गेला. गडचिरोलीहून उमरखेडकडे जाणारी राज्य परिवहन महामंडळाची बस अचानक नियंत्रणाबाहेर गेल्याने रस्त्याच्या कडेला पलटी झाली. या भीषण दुर्घटनेत 7 महिन्यांच्या चिमुकल्यासह तिघांचा जागीच मृत्यू झाला असून 33 प्रवासी जखमी झाले आहेत. अपघातानंतर बसमध्ये एकच गोंधळ आणि आरडाओरड सुरू झाली होती. या घटनेमुळे जिल्ह्यात शोककळा पसरली आहे. मिळालेल्या माहितीनुसार, नवेगाव-मुरखळा परिसरातील धोकादायक वळणावर चालकाचे बसवरील नियंत्रण अचानक सुटले. भरधाव वेगात असलेल्या बसने रस्त्यालगतचा लोखंडी कठडा तोडला आणि थेट शेजारील शेतात जाऊन पलटी घेतली. अपघाताचा आवाज इतका मोठा होता की परिसरातील नागरिक घटनास्थळी धावून आले. बस उलटल्यामुळे अनेक प्रवासी आत अडकून पडले होते. काहीजण जखमी अवस्थेत मदतीसाठी आक्रोश करत होते. या भीषण अपघातात ख्वाजा शाहबुद्दीन, लक्ष्मीबाई दुरकीवार आणि 7 महिन्यांचा शिवांश नवघरे यांचा मृत्यू झाला. तर जखमी झालेल्या 33 प्रवाशांना तातडीने जवळच्या रुग्णालयात उपचारासाठी दाखल करण्यात आले. काही प्रवाशांची प्रकृती गंभीर असल्याची माहिती समोर येत आहे. अपघातानंतर स्थानिक नागरिकांनी तत्काळ मदतकार्य सुरू केले. बसचे दरवाजे अडकून पडल्याने नागरिकांनी खिडक्या फोडून प्रवाशांना बाहेर काढले. घटनास्थळी काही काळ गोंधळाचे वातावरण निर्माण झाले होते. एसटीच्या सुरक्षिततेबाबत पुन्हा प्रश्न दरम्यान, अपघाताची माहिती मिळताच पोलीस आणि प्रशासनाचे अधिकारी घटनास्थळी दाखल झाले. बचाव पथकांनी मदतकार्य वेगाने सुरू करत जखमींना बाहेर काढले. या घटनेनंतर एसटीच्या सुरक्षिततेबाबत पुन्हा प्रश्न उपस्थित केले जात आहेत. विशेषतः धोकादायक वळणांवर सुरक्षेच्या उपाययोजना पुरेशा आहेत का, यावर चर्चा सुरू झाली आहे. या दुर्घटनेमुळे गडचिरोली जिल्ह्यात हळहळ व्यक्त केली जात असून मृतांच्या कुटुंबीयांवर दुःखाचा डोंगर कोसळला आहे.
