बातमी ऐका (Marathi Voice Reader)
शिवसेना ठाकरे गटातील फुटीर खासदार आणि सध्या उपमुख्यमंत्री एकनाथ शिंदे यांच्या शिवसेना शिंदे गटात प्रवेश केलेले संजय दिना पाटील यांनी आज पत्रकारांशी बोलताना अर्वाच्य भाषेचा वापर केल्याने खळबळ उडाली आहे. त्यांच्या या वादग्रस्त विधानाचे पडसाद अधिवेशनातही उमटलेले दिसले. त्यानंतर मुख्यमंत्र्यांनी देखील तीव्र नाराजी व्यक्त केली आहे. आता वकील गुणरत्न सदावर्ते यांनी देखील आक्रमक भूमिका घेतली आहे. गुणरत्न सदावर्ते म्हणाले, संजय दिना पाटील यांच्या प्रकरणात मी पत्रकारांसोबत आहे. पत्रकारांनी निसंकोचपणे समोर यावे. मी त्यांच्यासोबत जाईल. जितेंद्र आव्हाड योग्य बोलले. संजय दिना पाटील यांना काहीच माहीत नाही. संजय दिना पाटील यांना रेडीमेड मिळालेले आहे. त्यांना संघर्ष माहीत नाही. त्यांना लोकशाही माहीत नाही, अशी टीका सदावर्ते यांनी केली आहे. महाराष्ट्र हे खपवून घेत नाही पुढे बोलताना गुणरत्न सदावर्ते म्हणाले, मी या मटेरियलला ओळखत नाही. असे मटेरियल महाराष्ट्रात चालत नाही. सामान्य मराठी भाषेत संजय दिना पाटील यांचे असे बोलणे म्हणजे माजलेपणाचे लक्षण आहे. अशा घटनेचा सगळ्यांनी सगळ्या राजकीय पक्षांनी निषेध करायला हवा. माझा कधी संजय दिना पाटील यांच्याशी संबंध आलेला नाही. पण हा प्रकार निंदनीय आणि निषेधार्ह आहे. असे वैचारिक महाराष्ट्रात चालत नाही, महाराष्ट्र हे खपवून घेत नाही. संजय पाटील हे लोकप्रतिनिधी आहेत, ते लोकांचे सेवक आहेत. देशात संविधान लागू झालं तेव्हापासून देशातली सगळी दादागिरी, पाटीलकी संपली. पत्रकारिता हा लोकशाहीचा चौथा स्तंभ आहे. पोलिसांनी या प्रकरणात थेट गुन्हा दाकल करावा. राजकारण्यांची चिंता करू नये. असेच चालू राहिले तर उपमुख्यमंत्री एकनाथ शिंदे यांच्या पक्षाचे नाव शिंदे टोळी असे पडेल, असा टोलाही गुणरत्न सदावर्ते यांनी लगावला आहे. पत्रकाराच्या केसाला धक्का लागला तर कायदेशीर परिणाम भोगावे लागतील गुणरत्न सदावर्ते म्हणाले, पाच खून कोणाचे केले ते संजय दिना पाटील यांना सांगावे लागेल. पोलिसांनी त्याचा तपास करावा. आज एकनाथ शिंदेंनी संजय दिना पाटील यांना बोलावून घेऊन पत्रकारांसमोर उभे करायला हवे होते. मुख्यमंत्र्यांनी क्रिमिनल कायद्यानुसार कारवाई करावी. तसेच पत्रकाराच्या केसाला धक्का लागला तर कायदेशीर परिणाम भोगावे लागतील, असा इशाराही सदावर्ते यांनी दिला आहे. तसेच शेवटी, संजय दिना पाटील यांचा बोंब मारून मी निषेध व्यक्त करतो. पोलिसांनी तातडीने गुन्हा दाखल करावा आणि मी संजय दिना पाटील विरोधात गुन्हा दाखल करायला तयार आहे. मी पत्रकारांसोबत आहे, असेही सदावर्ते यांनी म्हटले आहे.
