बातमी ऐका (Marathi Voice Reader)
जेव्हा कडक उन्हात घसा कोरडा पडतो आणि पाण्यासाठी पायपीट करावी लागते, तेव्हा पाण्याचा एक हंडाही अमृतासारखा वाटतो. असाच काहीसा ‘अमृताचा अनुभव’ शहापूर तालुक्यातील कोठारे येथील ३०० आदिवासी कुटुंबांनी घेतला. विविध सामाजिक संस्था आणि संवेदनशील सुजाण नागरिकांनी एकत्र येत राबवलेली “आयडेंटिटी वॉटर फॉर लाइफ – जलदान मोहीम २०२६” ही केवळ पाणी वाटपाची मोहीम ठरली नाही, तर ती माणुसकी आणि आशेचा नवा किरण घेऊन आली. माउलींच्या चेहऱ्यावर हसू, चिंता मिटली : ज्या गावात महिलांना पाण्यासाठी दररोज ५ ते ६ किलोमीटरची खडतर पायपीट करावी लागते, तिथे जेव्हा पाण्याचे टँकर पोहोचले, तेव्हा त्यांचा आनंद गगनात मावेनासा झाला. किमान आठवडाभरासाठी पाण्याची चिंता मिटल्यामुळे आदिवासी भगिनींच्या चेहऱ्यावर हसू उमटले होते. तब्बल १०,००० लिटर शुद्ध पाण्याचे वाटप करून ३०० हून अधिक कुटुंबांची तहान भागवली. पाण्याचा प्रत्येक थेंब अनमोल असतो, याची प्रचिती या वेळी संपूर्ण गावाने अनुभवली. रोज सकाळी उठल्यावर पाणी कुठून आणायचं, हाच विचार डोक्यात असायचा. पोराबाळांना सोडून मैलोन्‌मैल चालावं लागायचं. आज पाणी दारात आलेलं पाहून ऊर भरून आलाय, अशी भावनिक प्रतिक्रिया आदिवासी महिलांनी व्यक्त केली. केवळ पाणी पुरवणे एवढाच या मोहिमेचा उद्देश नसून, दुर्गम भागात आशेचा किरण निर्माण करणे, आरोग्य सुधारणे आणि शाश्वत बदल घडवणे हा या उपक्रमाचा मुख्य हेतू असल्याचे आयोजकांनी सांगितले. आयोजकांकडून कायमस्वरूपी तोडगा नेहमीप्रमाणे फक्त पाणी देऊन निघून जाण्यापेक्षा या समस्येवर कायमस्वरूपी तोडगा काढण्याचा निर्धार आयोजकांनी केला आहे. या दुर्गम आदिवासी भागात भविष्यात एक लहान धरण उभारण्याचे अधिकृत आश्वासन संस्थांच्या वतीने देण्यात आले आहे. यामुळे येथील पाण्याचा प्रश्न कायमचा सुटणार असून, गावकऱ्यांना मोठा दिलासा मिळणार आहे. हिरकणी क्लबचे सदस्य उपस्थित ही मोहीम यशस्वी करण्यासाठी जी.जी.यू.एस. फाउंडेशनचे गगन शिंदे, हेल्पिंग हँड्स वेल्फेअर सोसायटी, स्मधूना फाउंडेशनचे प्रतीक आंबेकर तसेच मनीषा सुर्वे (सचिव, हिरकणी महिला सायकल क्लब) यांनी विशेष परिश्रम घेतले. याप्रसंगी हिरकणी क्लबच्या सदस्या प्रणिता भोसले, समृद्धी राणे आणि जयवंत सुर्वे हेदेखील उपस्थित होते.
