बातमी ऐका (Marathi Voice Reader)
पंढरपूर : पंढरपूरच्या पवित्र भूमीत त्या रात्री दुःखाचा डोंगर कोसळला. ‘आई, इथे मला मारायला लागलेत, लवकर ये, मला वाचव,’ असा थरकाप उडवणारा व्हॉट्सअॅप संदेश आईला पाठवल्यानंतर अवघ्या काही तासांतच एका 23 वर्षीय तरुणाचा संशयास्पद मृत्यू झाल्याची धक्कादायक घटना रविवारी रात्री पंढरपुरात उघडकीस आली. शुभम मोनाप्पा सुतार (वय 23, मूळ रा. सिद्धनाथ, ता. जत, जि. सांगली; सध्या रा. गाडगे महाराज चौक, पंढरपूर) असे मृत तरुणाचे नाव आहे.
मिळालेल्या माहितीनुसार, रविवारी दुपारी दीडच्या सुमारास शुभमने आपल्या आईला लक्ष्मी टाकळी येथील लक्ष्मी हॉटेलचे लोकेशन पाठवून स्वतःला मारहाण होत असल्याचे कळवले होते. संदेश मिळताच आईने तातडीने घटनास्थळी धाव घेतली; मात्र तेथे शुभम आढळून आला नाही.
त्यानंतर रात्री साडेदहाच्या सुमारास शुभमचा भाऊ संदीप याला रस्त्यावर एका मित्राची कार दिसली. संशय आल्याने त्याने कारजवळ जाऊन पाहिले असता शुभम गंभीर जखमी अवस्थेत आणि कोणतीही हालचाल न करत पडलेला दिसला. कारमधील तिघांनी ‘त्याला पंधरा मिनिटांत घरी आणून सोडतो’ असे सांगून तेथून पळ काढला.
संदीप संशयावरून कारचा पाठलाग करत मागावर राहिला. ती कार थेट पंढरपुरातील लाइफलाइन हॉस्पिटलमध्ये जाऊन थांबली. तेथे तपासणी केली असता डॉक्टरांनी शुभमला मृत घोषित केले.
या घटनेमुळे परिसरात तीव्र संताप व खळबळ उडाली आहे. पोलिसांनी या घटनेची अत्यंत गंभीर दखल घेतली असून प्राथमिक तपास सुरू केला आहे. तरुणाला करण्यात आलेल्या मारहाणीचे नेमके कारण काय होते आणि कारमधील व्यक्तींची यात काय भूमिका आहे, याचा शोध पोलीस घेत आहेत. संशयित आरोपींच्या अटकेसाठी विविध ठिकाणी पथके रवाना करण्यात आल्याची माहिती पोलिसांनी दिली. रविवारी रात्री उशिरापर्यंत या प्रकरणी गुन्हा दाखल करण्याची प्रक्रिया सुरू होती.
