बातमी ऐका (Marathi Voice Reader)
मुंबईतील प्रसिद्ध सिद्धिविनायक मंदिराच्या प्रस्तावित कॉरिडॉर प्रकल्पावरून आता नवीन वाद समोर आला आहे. प्रभादेवी परिसरातील नर्दुल्ला टँक मैदानावर पार्किंग उभारण्याचा प्रस्ताव मांडण्यात आल्याने स्थानिक नागरिकांमध्ये तीव्र नाराजी पसरली आहे. या निर्णयामुळे परिसरातील मोकळी जागा कमी होणार असल्याची भीती व्यक्त केली जात असून मैदान वाचवण्यासाठी मोठ्या आंदोलनाची तयारी सुरू झाली आहे. शिवसेना उद्धव बाळासाहेब ठाकरे गटानेही या मुद्द्यावर आक्रमक भूमिका घेत नागरिकांच्या बाजूने उभे राहत भव्य मोर्चाचे आयोजन केले आहे. नर्दुल्ला टँक मैदान हे प्रभादेवी परिसरातील नागरिकांसाठी महत्त्वाचे ठिकाण मानले जाते. लहान मुलांचे खेळ, ज्येष्ठ नागरिकांची सकाळ-संध्याकाळची फेरफटका, तसेच विविध सामाजिक आणि सांस्कृतिक कार्यक्रमांसाठी या मैदानाचा मोठ्या प्रमाणावर वापर केला जातो. मात्र, सिद्धिविनायक कॉरिडॉर प्रकल्पांतर्गत येथे पार्किंग उभारण्याचा प्रस्ताव समोर आल्यानंतर स्थानिकांमध्ये अस्वस्थता निर्माण झाली आहे. विकासाच्या नावाखाली नागरिकांची हक्काची मोकळी जागा हिरावली जात असल्याचा आरोप आंदोलकांकडून करण्यात येत आहे. या पार्श्वभूमीवर मैदान वाचवण्यासाठी सिद्धिविनायक मंदिराशेजारील परिसरात मोठा मोर्चा काढण्यात येणार आहे. या आंदोलनात स्थानिक नागरिकांसह शिवसेना ठाकरे गटाचे कार्यकर्ते आणि पदाधिकारी मोठ्या संख्येने सहभागी होणार आहेत. स्थानिक आमदार महेश सावंत, नगरसेवक निशिकांत शिंदे यांच्यासह पक्षाचे अनेक नेते या आंदोलनात सहभागी होणार असल्याची माहिती देण्यात आली आहे. नागरिकांनीही मोठ्या संख्येने मोर्चात सहभागी होऊन मैदान वाचवण्यासाठी आवाज उठवावा, असे आवाहन आयोजकांकडून करण्यात आले आहे. आंदोलनकर्त्यांनी स्पष्ट भूमिका घेत विकासकामांना विरोध नसल्याचे सांगितले आहे. मात्र, सार्वजनिक मैदानांवर अतिक्रमण करून पार्किंगसारखे प्रकल्प राबवले जाणे योग्य नसल्याचा मुद्दा त्यांनी मांडला आहे. स्थानिक नागरिकांच्या दैनंदिन जीवनाशी निगडित असलेल्या जागांवर अशा प्रकारचे निर्णय घेताना प्रशासनाने नागरिकांचा विचार करणे गरजेचे असल्याचेही आंदोलकांचे म्हणणे आहे. या मुद्द्यावरून प्रभादेवी परिसरात वातावरण चांगलेच तापले असून पुढील काही दिवसांत आंदोलन आणखी तीव्र होण्याची शक्यता व्यक्त केली जात आहे. आंदोलनाला अधिक राजकीय धार दरम्यान, आमदार महेश सावंत यांनीही या प्रश्नावर प्रतिक्रिया देताना स्पष्ट केले की, आमचा विरोध सिद्धिविनायक कॉरिडॉर प्रकल्पाला नाही. मात्र मैदान काढून घेण्याच्या प्रयत्नाला आम्ही विरोध करत आहोत. शिवसेना असताना हा प्रयत्न यशस्वी होऊ देणार नाही. त्यांच्या या वक्तव्यानंतर आंदोलनाला अधिक राजकीय धार मिळाल्याचे चित्र दिसत आहे. त्यामुळे आता प्रशासन आणि आंदोलक यांच्यातील संघर्ष आणखी वाढण्याची चिन्हे दिसू लागली आहेत.
