बातमी ऐका (Marathi Voice Reader)
जिल्ह्यात पेट्रोल व डिझेलचा पुरेसा साठा उपलब्ध असून, नागरिकांनी कोणत्याही प्रकारच्या अफवांवर विश्वास ठेवू नये तसेच आवश्यक तेवढ्याच इंधनाची खरेदी करावी, असे आवाहन जिल्हा प्रशासनाने केले आहे. रविवारी २४ मे रोजी विविध तेल कंपन्यांकडून जिल्ह्याला एकूण ५ लाख ६२ हजार लिटर इंधन साठा प्राप्त झाल्याचे जिल्हा प्रशासनाकडून सांगण्यात आले आहे. जिल्हा प्रशासन सर्व तेल कंपन्या तसेच जिल्ह्यातील पेट्रोल पंप चालकांच्या सतत संपर्कात असून सर्व पेट्रोल पंपांवर पेट्रोल व डिझेल मुबलक प्रमाणात उपलब्ध होत आहे. इंधनाचे सुरळीत वितरण व्हावे यासाठी पोलीस प्रशासनालाही आवश्यक सूचना देण्यात आल्या आहेत. नागरिकांनी अतिरिक्त स्वरूपात पेट्रोल किंवा डिझेलची खरेदी करून पेट्रोल पंपांवर अनावश्यक गर्दी करू नये. गरजेपुरताच इंधन साठा खरेदी करून प्रशासनाला सहकार्य करावे, असे आवाहनही करण्यात आले आहे. दरम्यान, अत्यावश्यक वस्तू कायदा १९५५ अंतर्गत कलम ३ व ७ नुसार विहित मर्यादेपेक्षा अधिक इंधन साठा करणे, साठेबाजी करणे अथवा नफेखोरी करणे हा गंभीर फौजदारी गुन्हा आहे. अशा प्रकारे अतिरिक्त किंवा अनधिकृत इंधन साठा करणारे नागरिक, व्यापारी तसेच पेट्रोल पंप चालक अथवा मालक यांच्याविरुद्ध कठोर फौजदारी स्वरुपाची देखील कारवाई करण्यात येणार असल्याचा स्पष्ट इशारा प्रशासनाकडून देण्यात आलेला आहे. इंडियन ऑईल कॉर्पोरेशनकडून ४९ हजार लिटर पेट्रोल व २ लाख १७ हजार लिटर डिझेल, भारत पेट्रोलियम कॉर्पोरेशन लिमिटेडकडून २७ हजार लिटर पेट्रोल व १ लाख ३६ हजार लिटर डिझेल, हिंदुस्तान पेट्रोलियम कॉर्पोरेशन लिमिटेडकडून २७ हजार लिटर पेट्रोल व ८६ हजार लिटर डिझेल, तसेच नायरा एनर्जीकडून १० हजार लिटर पेट्रोल व १० हजार लिटर डिझेल असा साठा जिल्ह्याला प्राप्त झाला आहे. यामध्ये एकूण १ लाख १३ हजार लिटर पेट्रोल व ४ लाख ४९ हजार लिटर डिझेलचा समावेश असून एकत्रित इंधन साठा ५ लाख ६२ हजार लिटर इतका आहे. पुढील काही दिवसांतही दररोज इंधन साठा जिल्ह्यासाठी प्राप्त होणार आहे. पुढील काही दिवसात दररोज इंधन साठा प्राप्त होणार
