प्रतिनिधी | घोटी इगतपुरी तालुक्यातील जिंदाल पॉलिफिल्म्स कंपनीत घडलेल्या दोन वेगवेगळ्या चोरीच्या घटनांमध्ये घोटी पोलिसांनी तिघा आरोपींच्या मुसक्या आवळल्या असून, त्यांच्याविरुद्ध गुन्हा दाखल करण्यात आला आहे. याबाबत अधिक माहिती अशी की, २५ मे रोजी कंपनीतून ४२ हजार रुपये व २३ हजार रुपये किंमतीची अशी एकूण ६५ हजार रुपये किंमतीची केबल चोरीला गेली होती. याप्रकरणी कंपनीच्या व्यवस्थापकाने घोटी पोलीस ठाण्यात तक्रार दाखल केली होती. या गुन्ह्यात पोलिसांनी सतिष विनोद सोनी व भुपेंद्र प्रमोद गिरी (दोघे रा. मध्यप्रदेश) यांना अटक केली आहे. दरम्यान, दुसऱ्या घटनेत २८ मे रोजी ट्रेलरचालक संशयित आरोपी भागू कीर उदयरामजी (रा. गोविंदपुरा, जिल्हा भिलवाड, राजस्थान) याने त्याच्या ताब्यातील ट्रेलरमधून (आरजे ०६ जीबी ७१६८) जिंदाल कंपनीत सामान शिफ्टिंग केले होते. त्यानंतर गाडीत तांत्रिक बिघाड झाल्याचा बहाणा करून तो कंपनीबाहेर जात असताना कंपनीच्या सुरक्षारक्षकांनी गाडीची कॅबिन तपासली. त्यावेळी कॅबिनमध्ये दीड लाख रुपये किंमतीची सुमारे १०० किलो कॉपरची तार लपवून चोरी केल्याचे उघड झाले. या दोन्ही प्रकरणांचा तपास पोलीस निरीक्षक विजय शिंदे यांच्या मार्गदर्शनाखाली पोलीस उपनिरीक्षक प्रतिक भिंगारदे, पोलीस हवालदार प्रकाश कासार, परिक्षित इंगळे, बाळासाहेब आहेर, दीपक सांगळे, संतोष नागरे, लक्ष्मण धकाते आणि प्रभु ठोंबरे यांच्या पथकाने केला. तपासानंतर तिन्ही आरोपींना अटक करण्यात आली आहे. या दोन्ही घटनांमुळे औद्योगिक परिसरातील सुरक्षेचा प्रश्न पुन्हा ऐरणीवर आला असून, कंपनी प्रशासनाने सुरक्षा व्यवस्था अधिक कडक करण्यास सुरुवात केली आहे. तसेच, चोरीस गेलेले साहित्य जप्त करण्यासाठी पोलिसांकडून पुढील तपास सुरू असल्याची माहिती देण्यात आली.
