बातमी ऐका (Marathi Voice Reader)
ठाण्यातील ज्युपिटर रुग्णालयाबाहेर घडलेल्या एका धक्कादायक घटनेने राज्यभरात संतापाची लाट उसळली आहे. किरकोळ कारणावरून एका परप्रांतीय ओला चालकाने ज्येष्ठ नागरिकाला भररस्त्यात बेदम मारहाण केल्याचा व्हिडिओ सोशल मीडियावर व्हायरल झाला असून, या प्रकरणाने पुन्हा एकदा परप्रांतीयांच्या दादागिरीचा मुद्दा ऐरणीवर आला आहे. राज ठाकरे यांनी वृद्धाशी साधला संवाद या प्रकरणाची राज्यभर चर्चा सुरू असतानाच महाराष्ट्र नवनिर्माण सेनेचे अध्यक्ष राज ठाकरे यांनीही या घटनेची दखल घेतली. मनसे नेते अविनाश जाधव यांच्या माध्यमातून राज ठाकरे यांनी मारहाण झालेल्या वृद्ध व्यक्तीशी दूरध्वनीवरून संवाद साधला. या संवादादरम्यान त्यांनी वृद्धांच्या प्रकृतीची विचारपूस केली तसेच न्याय मिळवून देण्यासाठी आपण त्यांच्या पाठीशी असल्याचा विश्वास दिल्याची माहिती समोर आली आहे. दरम्यान, मनसे नेते अविनाश जाधव यांनी या प्रकरणावर आक्रमक भूमिका घेत आरोपीवर कठोर कारवाईची मागणी केली आहे. नेमकं काय घडलं? मिळालेल्या माहितीनुसार, ठाण्यातील ज्युपिटर हॉस्पिटल परिसरात एका वृद्ध व्यक्तीने रस्त्यावर थुंकण्याबाबत संबंधित चालकाला जाब विचारला होता. यावरून दोघांमध्ये शाब्दिक वाद झाला. मात्र, वादानंतर चालकाने आपला संताप गमावत थेट वृद्ध व्यक्तीवर हल्ला चढवला. व्हायरल झालेल्या सीसीटीव्ही आणि मोबाईल व्हिडिओमध्ये आरोपी चालक वृद्धाला धक्काबुक्की करताना, कानशिलात लगावताना आणि जमिनीवर पाडून मारहाण करताना दिसत आहे. धक्कादायक बाब म्हणजे वृद्ध व्यक्ती खाली कोसळल्यानंतरही आरोपीने त्यांना मारहाण सुरूच ठेवली. घटनास्थळी उपस्थित असलेल्या एका वृद्ध महिलेने आणि इतर नागरिकांनी हस्तक्षेप करण्याचा प्रयत्न केला. काहींनी आरोपीला पकडून रोखण्याचाही प्रयत्न केला. मात्र, तो कोणाचेही ऐकण्याच्या मनःस्थितीत नसल्याचे व्हिडिओमध्ये दिसून येते. संपूर्ण बातमी येथे वाचा व्हिडिओ व्हायरल होताच संताप घटनेचा व्हिडिओ सोशल मीडियावर व्हायरल झाल्यानंतर नागरिकांमध्ये तीव्र संताप व्यक्त करण्यात आला. वृद्ध व्यक्तीवर झालेल्या हल्ल्याबद्दल आरोपीवर कठोर कारवाई करण्याची मागणी सर्व स्तरांतून होऊ लागली. विशेषतः ज्येष्ठ नागरिकांच्या सुरक्षेचा प्रश्न पुन्हा एकदा चर्चेत आला असून, सार्वजनिक ठिकाणी अशा प्रकारे मारहाण होणे अत्यंत गंभीर असल्याची प्रतिक्रिया नागरिकांनी व्यक्त केली आहे. उपमुख्यमंत्री एकनाथ शिंदे संतप्त, थेट आयुक्तांना केला फोन या घटनेची गंभीर दखल घेत उपमुख्यमंत्री एकनाथ शिंदे यांनी थेट ठाणे पोलीस आयुक्तांशी संपर्क साधला. आरोपीविरोधात कठोर कारवाई करण्याचे निर्देश देताना त्यांनी भारतीय न्याय संहितेतील हत्येच्या प्रयत्नाशी संबंधित गंभीर कलमांखाली गुन्हा दाखल करण्यास सांगितल्याची माहिती समोर आली आहे. शिंदे यांनी या प्रकाराला अत्यंत निंदनीय संबोधत, कायदा हातात घेणाऱ्यांना कोणतीही सवलत दिली जाणार नाही, असा स्पष्ट इशारा दिला. दरम्यान, खासदार डॉ. श्रीकांत शिंदे यांनीही जखमी वृद्धाची फोन करून विचारपूस केली असून, आम्ही तुमच्यासोबत असल्याचे सांगितले. पुन्हा परप्रांतीयांचा मुद्दा चर्चेत या घटनेनंतर महाराष्ट्रात परप्रांतीयांच्या वाढत्या दादागिरीचा मुद्दा पुन्हा एकदा चर्चेचा विषय बनला आहे. सोशल मीडियावर अनेकांनी या घटनेचा निषेध करत स्थानिक नागरिकांच्या सुरक्षिततेबाबत चिंता व्यक्त केली आहे. राजकीय पक्षांनीही या घटनेवर प्रतिक्रिया देण्यास सुरुवात केली असून, पुढील काही दिवसांत हा विषय अधिक तापण्याची शक्यता व्यक्त केली जात आहे. वृद्ध व्यक्तीवर भररस्त्यात झालेल्या या हल्ल्यामुळे कायदा-सुव्यवस्थेचा प्रश्न पुन्हा एकदा ऐरणीवर आला असून, आता पोलिसांची पुढील कारवाई आणि आरोपीविरोधातील कठोर पावले याकडे सर्वांचे लक्ष लागले आहे.
