बातमी ऐका (Marathi Voice Reader)
पुण्यात एका तरुणाने गुन्ह्यात अडकवण्याच्या धमकीमुळे गळफास घेऊन आत्महत्या केली. या प्रकरणी त्याच्या लिव्ह-इन पार्टनरसह चौघांना अटक करण्यात आली आहे. ही घटना खराडी भागात घडली असून, आरोपींनी पैशांसाठी तरुणाला त्रास दिला होता. करण बाळासाहेब कांबळे (वय २८, मूळ रा. खरबा, मानवत, जि. परभणी) असे आत्महत्या केलेल्या तरुणाचे नाव आहे. या प्रकरणी प्रीती अनिकेत बोढर्डे उर्फ रमिसा उर्फ माही, उर्फ प्रीती सुधीर रणदिवे (वय ३१, रा. थिटे वस्ती, खराडी), अनिकेत बोढर्डे (वय ४१, रा. जेघेनगर, बिबवेवाडी), संस्कृती सुधीर रणदिवे (वय २५) आणि ऋतीक सुधीर रणदिवे (वय २६, दोघे रा. अप्पर इंदिरानगर, बिबवेवाडी) यांना अटक करण्यात आली आहे. पोलिसांनी दिलेल्या माहितीनुसार, आरोपी प्रीती आणि करण यांची ओळख झाली होती. प्रीतीचे यापूर्वी दोन विवाह झाले होते आणि ती पतीशी न पटल्याने वेगळी राहत होती. ओळखीतून प्रेमसंबंध निर्माण झाल्यानंतर करण आणि प्रीती खराडीतील थिटे वस्ती परिसरात एकत्र राहू लागले होते. त्यानंतर प्रीतीचा पहिला पती अनिकेत बोढर्डे, तिची बहीण संस्कृती आणि भाऊ ऋतीक यांनी करणला त्रास देण्यास सुरुवात केली. त्यांनी करणकडे पैशांची मागणी केली. पैसे न दिल्यास बलात्काराचा गुन्हा दाखल करण्याची धमकीही दिली. आरोपींच्या या सततच्या त्रासामुळे आणि धमकीमुळे करण नैराश्यात गेला होता. अखेर, १ जून रोजी करणने खराडीतील आपल्या राहत्या घरात गळफास घेऊन आत्महत्या केली, असे करणचा भाऊ कृष्णा कांबळे (वय ३४, सध्या रा. थिटे वस्ती, खराडी) यांनी खराडी पोलीस ठाण्यात दिलेल्या फिर्यादीत म्हटले आहे. कृष्णा कांबळे यांच्या फिर्यादीनुसार, पोलिसांनी चौघांविरुद्ध गुन्हा दाखल करून त्यांना अटक केली आहे. गुन्हे शाखेचे पोलीस निरीक्षक चंद्रसेन पालकर या प्रकरणाचा पुढील तपास करत आहेत.
