तासाभरात १९ मिमी पाऊस‎:वादळामुळे झाडे कोसळली; सायंकाळी ७ नंतर पुन्हा पाऊस‎

प्रतिनिधी | अमरावती चार दिवसांच्या खंडानंतर सोमवारी (दि. १) शहरात दुपारी साडेतीन वाजताच्या आसपास जोरदार पावसाने हजेरी लावली. सुमारे एक तास सोसाट्याचा वारा आणि पाऊस शहरात कोसळत होता. या एका तासामध्ये शहरात १९ मिमी पावसाची नोंद हवामान विभागाने केली आहे. यावेळी सोसाट्याचा वारा असल्यामुळे शहरातील काही भागात झाडे कोसळली असून लहान आकाराची गारसुध्दा पडली होती. या पावसामुळे वातावरणात गारवा निर्माण झाला आहे. एका तासात १९ मिमी पाऊस झाल्याची नोंद हवामान विभागाने केली आहे. आतापर्यंत यंदाचा सर्वाधिक मान्सुनपुर्व पाऊस ठरला आहे. पावसासोबतच काही भागात गारा कोसळल्या तर वाऱ्यामुळे मुख्य चौकांमध्ये लावलेले जाहीरातींचे फलक फाटले तर काही ठिकाणी झाडे उन्मळून रस्त्यावर पडले होते. शहरात दुपारी चार वाजताच्या सुमारास झालेल्या मान्सुनपूर्व वादळी पावसामुळे विविध परिसरात ११ मोठी झाडे कोसळल्याने परिसरातील वाहतूक खोळंबली. अग्निशमन विभागाने कॉल आल्यानंतर तत्काळ कारवाई करीत ही कोसळलेली झाडे रस्त्यावरून बाजुला केली. श्याम चौकातील ‘जे ॲन्ड डी’ मॉलच्या दर्शनी भागाचे सौंदर्य वाढवण्यासाठी बसवण्यात आलेली डेकोरेटिव्ह ग्लास शीट वादळी पावसामुळे धोकादायकरित्या खाली झुकली असून ती कधीही कोसळू शकते. परिणामी ती तत्काळ कापण्यात यावी, असे निर्देश अग्निशमन विभागाने मॉलच्या बिल्डरला दिल्याची माहिती केंद्र प्रमुख प्रेमानंद सोनकांबळे यांनी दिली. डॉ. प्रवीणकुमार, हवामानशास्त्रज्ञ, प्रादेशिक हवामान केन्द्र, नागपूर. आणखी तीन दिवस पावसाची शक्यता असणार…. हा मान्सूनपुर्व पाऊस असून आगामी तीन दिवस जिल्ह्यातील काही ठिकाणी हलका ते मध्यम स्वरुपाचा पाऊस कोसळण्याची शक्यता आहे. तसेच तापमानात आता तीन ते चार अंशांनी घट आली आहे. मान्सून जिल्ह्यात दाखल होण्यासाठी किमान १५ जून उजाडणार आहे. मंगळवारी (दि. २) मॉन्सून केरळमध्ये दाखल होण्याची शक्यता आहे.