पाचोरा तालुक्यातील लोहारा येथील दुर्गा माता चौकात शुक्रवारी मध्यरात्रीच्या सुमारास एका घराशेजारी उभी केलेली अंदाजे दीड लाख रुपये किमतीची “टीव्हीएस रायडर’ मोटरसायकल अज्ञात व्यक्तीने पेटवून दिल्याची धक्कादायक घटना घडली आहे. या समाजकंटकाच्या कृत्यामुळे संपूर्ण वाहन जळून खाक झाले असून, परिसरात तीव्र खळबळ उडाली आहे. लोहारा येथील रहिवासी रोहन उमेश पालीवाल यांच्या मालकीची मोटरसायकल (क्रमांक एमएच १९, ९९०४) नेहमीप्रमाणे त्यांच्या घराशेजारील जागेत उभी केलेली होती. मध्यरात्रीच्या सुमारास अज्ञात व्यक्तीने ती जाळून टाकली. विशेष म्हणजे, मोटारसायकल जळालेल्या ठिकाणापासून काही अंतरावरच एक माचिस आणि प्लास्टिकची बाटली आढळून आली आहे. यावरून कोणीतरी जाणीवपूर्वक पेट्रोल किंवा ज्वलनशील पदार्थ टाकून हे कृत्य केल्याचा संशय बळावला आहे. दुर्गामाता चौकासारख्या भरवस्तीच्या भागात अशा प्रकारे वाहन जाळण्याचा हा पहिलाच प्रकार घडल्याने स्थानिक नागरिकांमध्ये भीतीचे वातावरण पसरले आहे. “भरवस्तीत गाड्या जाळणे हा प्रकार अत्यंत भयावह असून, पोलिसांनी या प्रकरणाचा गांभीर्याने तपास करावा आणि दोषींवर कठोर कारवाई करावी,” अशी मागणी वाहनधारक रोहन पालीवाल व ग्रामस्थांनी केली आहे.
