बातमी ऐका (Marathi Voice Reader)
पुणे शहर आणि देशभरात मोठी खळबळ उडवून देणाऱ्या बहुचर्चित पोर्शे कार अपघात प्रकरणातील मुख्य अल्पवयीन आरोपीचे वडील आणि बांधकाम व्यावसायिक विशाल अग्रवाल यांच्या अडचणींत पुन्हा एकदा वाढ होण्याची दाट शक्यता आहे. सर्वोच्च न्यायालयातून जामीन मिळाल्यानंतर अग्रवाल यांचा एक व्हिडिओ सोशल मीडियावर मोठ्या प्रमाणावर व्हायरल झाला होता. या व्हिडिओची गंभीर दखल घेत, पुणे पोलिसांनी आता थेट त्यांचा जामीन रद्द करण्यासाठी कायदेशीर पावले उचलली असून, याप्रकरणी येत्या 23 जून रोजी सत्र न्यायालयात पोलिसांकडून रिट याचिका दाखल करण्यात येणार असल्याची माहिती वरिष्ठ अधिकाऱ्यांनी दिली आहे. वरिष्ठ पोलिस अधिकाऱ्यांनी दिलेल्या माहितीनुसार, सर्वोच्च न्यायालयाने पोर्शे कार अपघात प्रकरणातील आरोपी विशाल अग्रवाल यांना जामीन मंजूर करताना काही कठोर अटी घातल्या होत्या. या अटींपैकी एक अत्यंत महत्त्वाची अट म्हणजे, या दुर्दैवी अपघातात प्राण गमावलेल्या दोन्ही आयटी इंजिनिअर तरुणांच्या कुटुंबीयांना कोणत्याही प्रकारचा मानसिक किंवा शारीरिक त्रास होईल, असे कोणतेही कृत्य त्यांनी करू नये. मात्र, जामीन मिळताच सोशल मीडियावर विशाल अग्रवाल यांचा एक व्हिडिओ प्रचंड व्हायरल झाला असून, यामध्ये ते एका खोलीत आनंदोत्सव साजरा करत असल्याचा दावा केला जात आहे. पुणे पोलिसांनी केलेल्या तपासात असे निष्पन्न झाले आहे की, हा व्हिडिओ स्वतः विशाल अग्रवाल यांनीच त्यांच्या व्हॉट्सॲप स्टेटसवर ठेवला होता. हा स्टेटस पाहिल्याचा दावा करणाऱ्या दोन महत्त्वाच्या व्यक्तींचे जबाबही पोलिसांनी नोंदवून घेतले असून, याच जबाबांच्या आधारे आता न्यायालयात जामिनाच्या अटींचे उल्लंघन झाल्याचा भक्कम युक्तिवाद पोलिसांकडून केला जाणार आहे. व्हिडिओमुळे पीडित मृतांच्या कुटुंबीयांचे भावना दुखावल्या पोलिसांनी दिलेल्या माहितीनुसार, संबंधित व्हिडिओ जुना असला तरीही जामीन मिळाल्यानंतर तो व्हॉट्सॲप स्टेटसवर ठेवणे अत्यंत आक्षेपार्ह आहे. या भीषण अपघातात दोन निष्पाप तरुणांचा नाहक बळी गेला असून, त्यांचे कुटुंबीय अद्यापही या दुःखातून सावरलेले नाहीत. अशा अत्यंत संवेदनशील परिस्थितीत जामीन मिळाल्यानंतर आनंदोत्सव साजरा केल्याचा व्हिडिओ शेअर करणे, हे मृतांच्या कुटुंबीयांच्या जखमेवर मीठ चोळण्यासारखेच आहे. त्यामुळे हे कृत्य न्यायालयाच्या जामीन अटींचे थेट उल्लंघन करत असल्याचा दावा पोलिसांकडून न्यायालयात केला जाणार आहे. याच भक्कम आधारावर पुणे पोलिसांनी आता विशाल अग्रवाल यांचा जामीन तात्काळ रद्द करण्याची मागणी करण्याचा निर्णय घेतला आहे. यासाठी येत्या 23 जून रोजी न्यायालयात दाखल केल्या जाणाऱ्या रिट याचिकेसोबत हा व्हायरल व्हिडिओ, साक्षीदारांचे नोंदवलेले जबाब आणि इतर सर्व आवश्यक तांत्रिक पुरावे भक्कमपणे सादर केले जाणार आहेत.
