मुंबई महापालिकेतील प्रभादेवी वॉर्ड क्रमांक 194 मध्ये मोठा उलटफेर झाला आहे. याठिकाणी उपमुख्यमंत्री एकनाथ शिंदे यांच्या नेतृत्वातील सत्ताधारी शिवसेनेचे उमेदवार समाधान सरवणकर यांचा पराभव झाला आहे. शिवसेना उद्धव बाळासाहेब ठाकरे पक्षाचे उमेदवार निशिकांत शिंदे यांनी अतितटीच्या लढतीत त्यांचा पराभव झाला आहे. विधानसभा निवडणुकीत ठाकरे गटाच्या महेश सावंत यांनी सदा सरवणकर यांचा पराभव केला होता. त्यानंतर आता महापालिका निवडणुकीतही ठाकरे गटाने त्यांच्या मुलाचा पराभव केला आहे. यामुळे सदा सरवणकर यांना दुहेरी झटका सहन करावा लागला आहे. दादर – प्रभादेवीतील वॉर्ड 194 मध्ये ठाकरे व शिंदे गटात अत्यंत हायव्होल्टेज लढत होती. शिवसेनेतील फुटीनंतर हा वॉर्ड शिंदे गट व ठाकरे गटातील संघर्षाचा केंद्रबिंदू ठरला होता. आजी आमदार महेश सावंत यांनी पुन्हा एकदा कधी काळचे आपले गुरू माजी आमदार सदा सरवणकर यांच्याविरोधात शड्डू ठोकला. ठाकरे गटाने विधानसभा निवडणुकीत सदा सरवणकर यांचा पराभव केला होता. त्यामुळे सरवणकरांसाठी ही निवडणूक अत्यंत प्रतिष्ठेची बनली होती. महापालिका निवडणुकीत राज व उद्धव ठाकरे यांनी युती केली होती. या दोघांच्या युतीत हा वॉर्ड ठाकरे गटाच्या वाट्याला सुटला होता. निशिकांत शिंदेंनी दिली समाधान सरवणकरांना मात प्रभादेवी वॉर्ड क्रमांक 194 वर मनसेचे माजी नगरसेवक संतोष धुरी व ठाकरे गटाचे आमदार सुनील शिंदे यांचे बंधू निशिकांत शिंदे यांनी दावा केला होता. पण हा प्रभाग उद्धव ठाकरे यांच्या वाट्याला गेल्यामुळे संतोष धुरी नाराज झाले होते. त्यांनी राज ठाकरे यांनी उद्धव यांच्यापुढे सपशेल लोटांगण घातल्याचा आरोप करत भाजपमध्ये प्रवेश केला होता. याठिकाणी शिंदे गटाचे समाधान सरवणकर विरुद्ध निशिकांत शिंदे अशी अत्यंत चुरशीची लढत झाली होती. त्यानंतर आज झालेल्या मतमोजणीत निशिकांत शिंदे यांनी समाधान सरवणकर यांचा 592 मतांनी पराभव केला. सरवणकर व महेश सावंत यांच्यात राजकीय हाडवैर उल्लेखनीय बाब म्हणजे प्रभादेवी हा शिवसेनेचा बालेकिल्ला मानला जातो. सदा सरवणकर व महेश सावंत यांच्यात मागील काही वर्षांपासून संघर्ष वाढला आहे. 2017 मध्ये महेश सावंत यांना डावलून सदा सरवणकर यांनी मुलगा समाधान सरवणकर याच्यासाठी उमेदवारी घेतली. त्यानंतर सावंत यांनी बंडखोरी केली. मात्र, त्यांना अवघ्या 252 मतांनी पराभवाचा धक्का बसला. त्यानंतर महेश सावंत यांनी शिवसेनेत घरवापसी केली. शिवसेना फुटल्यानंतर सदा सरवणकर हे शिंदे यांच्यासोबत गेले. त्यानंतर प्रभादेवीत दोन्ही गटात राडा झाला. एका प्रसंगात सरवणकर यांनी पिस्तुलीतून गोळी झाडल्याचाही आरोप झाला. मुंबईत दिग्गजांच्या नातलगांना पराभवाचा धक्का दुसरीकडे, मुंबईत अनेक दिग्गजांच्या नातलगांना पराभवाचा धक्का बसला आहे. गँगस्टर अरुण गवळींची मुलगी गीता गवळी या प्रभाग क्रमांक 212 मधून मैदानात उतरल्या होत्या. त्यांचा पराभव झाला आहे. तर रवींद्र वायकर यांच्या कन्या दिप्ती वायकर यांनाही पराभवाचा धक्का बसला. शिवसेनेने प्रभाग क्रमांक 73 मध्ये दीप्ती वायकर पोतनीस यांना उमेदवारी दिली होती. मात्र शिवसेना ठाकरे गटाच्या उमेदवाराकडून त्यांना पराभवाचा धक्का बसला. प्रभाग क्रमांक 184 मध्ये खासदार राहुल शेवाळे यांच्या वहिनी वैशाली शेवाळे यांना पराभूत व्हावे लागले. काँग्रेसच्या आशा काळे यांनी त्यांचा पराभव केला. सत्ताधारी राष्ट्रवादी काँग्रेसचे नेते नवाब मलिक यांचे बंधू कप्तान मलिक यांचा पराभव झाला आहे. ते कुर्ल्याच्या प्रभाग क्रमांक 165 मधून मैदानात होते. महापालिका निवडणुकीत चर्चेत असलेल्या काही उमेदवारांचाही या निवडणुकीत मोठा विजय झाला आहे. त्यात ठाकरे गटाचे मिलिंद वैद्य, हेमांगी वरळीकर, तर भाजपच्या तेजस्वी घोसाळकर आणि असलम शेख यांच्या भगिनीने विजय मिळवला आहे.
