पाऊसमान अकोल्यातील मुळा खोऱ्यात आनंद! आंबित ओव्हरफ्लो:गतवर्षीपेक्षा महिनाभर उशीर, तरीही प्रथम भरण्याचा मान कायम

अकोले तालुक्याच्या मुळा खोऱ्यातील दुर्गम आदिवासी भागासाठी रविवार, २८ जूनचा दिवस मोठा आनंदाचा ठरला. मुळा नदीवरील अंबित लघुपाटबंधारे जलाशय पूर्ण १९१ दशलक्ष घनफूट क्षमतेने भरून सकाळी सांडव्यावरून ओव्हरफ्लो झाला. यंदा मान्सूनने सुरुवातीला ओढ दिली असली, तरी जूनच्या शेवटच्या आठवड्यात झालेल्या पावसाने अंबित जलाशय तुडुंब भरल्याने संपूर्ण मुळा नदीखोऱ्यात समाधानाचे वातावरण पसरले आहे. अकोले तालुक्यातील सर्व लघु पाटबंधारे प्रकल्पांमध्ये अंबित जलाशय दरवर्षी सर्वप्रथम भरण्याचा मान राखतो. यंदा २८ जूनला तो ओव्हरफ्लो झाला. २०२५ मध्ये हा जलाशय २८ मे रोजी, तर २०२४ मध्ये ४ जुलै रोजी पूर्ण भरला होता. यंदा पावसाने दडी मारल्याने मागील वर्षाच्या तुलनेत एक महिना उशिराने जलाशय भरले, तरीही पावसाच्या प्रतीक्षेत असलेल्या शेतकऱ्यांच्या चेहऱ्यावर हसू फुलले आहे. तालुक्यात अद्याप समाधानकारक मान्सूनचा पाऊस झालेला नाही. आता या पाण्यावरच सह्याद्रीच्या डोंगररांगांमधील भात खाचरांतून खरीप हंगामातील भात, नाचणी, वरई यांसारख्या पारंपरिक पिकांच्या लागवडीस आदिवासी भागात सुरुवात होईल. दुर्गम भागातील शेती प्रामुख्याने पावसावरच अवलंबून असल्याने जलाशय भरल्याने शेतकऱ्यांना मोठा दिलासा मिळाला आहे. सांडव्यावरून ओसंडून वाहणाऱ्या अंबित जलाशयाचा मनमोहक नजारा पाहण्यासाठी नागरिकांनी सकाळपासूनच गर्दी केली होती. पांढऱ्याशुभ्र दुधासारख्या धारा सांडव्यावरून कोसळताना पाहून लहानथोरांनी आनंद व्यक्त केला. उशिरा का होईना, पण पावसाळ्यात सर्वप्रथम अंबितने दिलेल्या या जलदेणगीमुळे मुळा खोऱ्यातील शिवार पुन्हा हिरवाईने नटण्यास सज्ज झाले आहे. पिंपळगावखांड धरणाकडे पाण्याचा प्रवास अंबित जलाशयाच्या सांडव्यावरून वाहणारे पाणी मुळा नदीपात्रातून थेट पिंपळगावखांड जलाशयात जमा होत आहे. पिंपळगावखांड जलाशयातून पुढे ते राहुरी तालुक्यातील ज्ञानेश्वर सागरात (मुळा धरणाकडे) झेपावते. अंबित भरल्याने आता पिंपळगावखांड धरण भरण्याकडे सर्वांचे लक्ष लागले आहे. मुळा नदीपात्रातील वाढत्या पाणीपातळीमुळे परिसरातील विहिरींची पातळी वाढणार असून जनावरांच्या पिण्याच्या पाण्याचा प्रश्नही सुटणार आहे.