बातमी ऐका (Marathi Voice Reader)
हैदर शेख, प्रतिनिधी, चंद्रपूर : हवामान विभागाने चंद्रपूर जिल्ह्यासाठी मुसळधार ते अतिमुसळधार पावसाचा इशारा दिला आहे. या पार्श्वभूमीवर प्रशासनाने सुरक्षेच्या दृष्टीने तातडीने पावले उचलली असून जिल्ह्यातील सर्व शिक्षण संस्थांना सुट्टी घोषित केली आहे. स्थानिक नागरिकांनाही सतर्क राहण्याचे आवाहन प्रशासनाकडून करण्यात आले आहे.
हवामान विभागाचा ‘रेड अलर्ट’
हवामान खात्याने चंद्रपूर जिल्ह्यासाठी उद्या आणि परवा असे सलग दोन दिवस मुसळधार पावसाचा म्हणजेच ‘रेड अलर्ट’ जारी केला आहे. या कालावधीत मुसळधार पाऊस होण्याची मोठी शक्यता वर्तवण्यात आली असून, यामुळे सखल भागात पाणी साचणे तसेच जनजीवन विस्कळीत होण्याचा धोका निर्माण झाला आहे.
पावसामुळे शाळा, कॉलेज आणि क्लासेसला सुट्टी
या मुसळधार पावसाची शक्यता आणि विद्यार्थ्यांची सुरक्षितता लक्षात घेऊन जिल्हाधिकारी वसुमना पंत यांनी जिल्ह्यातील सर्व शाळा, महाविद्यालये आणि खाजगी कोचिंग क्लासेसला उद्या सुट्टी जाहीर करण्याचे आदेश निर्गमित केले आहेत. संभाव्य धोका टळावा आणि विद्यार्थ्यांना कोणताही त्रास होऊ नये, यासाठी हा निर्णय घेण्यात आला आहे.
सावधगिरी बाळगा, प्रशासनाकडून आवाहन
पावसाचा तीव्र इशारा पाहता जिल्हा प्रशासनाकडून सर्व नागरिकांना योग्य ती काळजी आणि सावधगिरी बाळगण्याच्या सूचना देण्यात आल्या आहेत. अतिमहत्त्वाचे काम नसताना नागरिकांनी घराबाहेर पडणे टाळावे, तसेच नदी-नाले किंवा सखल भागांजवळ न जाण्याचे आवाहन प्रशासनाकडून करण्यात आले आहे.
