बातमी ऐका (Marathi Voice Reader)
सोलापूर : शेतीमधून भरघोस उत्पन्न मिळवण्यासाठी प्रत्येक शेतकरी नेहमीच नवनवीन प्रयोग करत असतो आणि प्रचंड मेहनत घेत असतो. असाच एक प्रयोग सोलापूर जिल्ह्यातील मोहोळ तालुक्यातील शेतकरी गंगाधर म्हमाणे यांनी करून दाखवला आहे. त्यांनी आपल्या शेतात केलेल्या काकडीच्या लागवडीतून अवघ्या 40 दिवसांत तब्बल 1 लाख 50 हजार रुपयांचे उत्पन्न मिळवले आहे. बाजारपेठेत असाच दर टिकून राहिला, तर या हंगामात 10 लाख रुपयांपर्यंत नफा मिळेल, असा विश्वास त्यांनी व्यक्त केला आहे.
4 एकरांत बेल्ली जातीची लागवड
गंगाधर म्हमाणे यांनी आपल्या 4 एकर शेती क्षेत्रामध्ये बेल्ली या वाणाची काकडी लागवड केली आहे. लागवडीनंतर साधारण 42 दिवसांनी पिकाची काढणी सुरू झाली असून, आतापर्यंत काकडीचे दोन तोडे यशस्वीरीत्या पूर्ण झाले आहेत. या संपूर्ण लागवडीसाठी त्यांना सुमारे दीड लाख रुपये खर्च आला होता. विशेष म्हणजे, पहिल्याच तोडणीमध्ये काकडी लागवडीचा सर्व खर्च निघून गेला आहे, अशी माहिती म्हमाणे यांनी दिली.
प्रमुख शहरांतील बाजारात मागणी
मोहोळ येथील शेतात पिकलेली ही काकडी केवळ स्थानिक बाजारातच नव्हे, तर पुणे, मुंबई, सोलापूर आणि हैदराबाद यांसारख्या मोठ्या शहरांमधील बाजारात विक्रीसाठी पाठवली जात आहे. सध्या बाजारात काकडीला चांगला भाव मिळत असून, हेच दर टिकून राहिल्यास 4 एकरांतून 10 लाखांचा निखळ नफा हातात येईल, असा अंदाज त्यांनी वर्तवला आहे.
कमी खर्चात जास्त उत्पन्नाचा मार्ग
काकडी हे पीक अत्यंत कमी कालावधीत आणि कमी खर्चात जास्त उत्पन्न देणारे पीक आहे. या पिकाच्या लागवडीला आणि फवारणीला इतर पिकांच्या तुलनेत खूप कमी खर्च येतो. त्यामुळे पारंपरिक शेतीला फाटा देत जास्तीत जास्त शेतकऱ्यांनीदेखील काकडीची लागवड करून अधिकाधिक नफा मिळवावा, असे आवाहन शेतकरी गंगाधर म्हमाणे यांनी केले आहे.
