शेतात चारा आणण्यासाठी गेलेल्या महिलेचा दुर्दैवी अंत; मारेगाव ग्रामीण रुग्णालयात उपचारादरम्यान मृत्यू
मारेगाव : सुरेश पाचभाई
मारेगाव तालुक्यातील घोडदरा येथे शेतात चारा आणण्यासाठी गेलेल्या अल्पभूधारक शेतकरी महिलेचा सर्पदंशाने मृत्यू झाल्याची दुर्दैवी घटना सोमवार, दि. ३ ऑगस्ट रोजी दुपारी घडली. शितल नंदकिशोर मिलमिले (वय अंदाजे ३२), रा. घोडदरा, ता. मारेगाव, जि. यवतमाळ असे मृत महिलेचे नाव आहे. या घटनेने घोडदरा परिसरात हळहळ व्यक्त होत आहे.
मिळालेल्या माहितीनुसार, शितल मिलमिले या शेतात चारा आणण्यासाठी गेल्या होत्या. यावेळी त्यांना सर्पदंश झाला. सर्पदंश झाल्याचे लक्षात येताच नातेवाईकांनी त्यांना तातडीने मारेगाव येथील ग्रामीण रुग्णालयात उपचारासाठी दाखल केले. मात्र, उपचार सुरू असतानाच दुपारी सुमारे 2:30 वाजण्याच्या सुमारास त्यांचा मृत्यू झाला.
शितल मिलमिले यांच्या कुटुंबाची आर्थिक परिस्थिती हलाखीची आहे. त्यांच्या पतीच्या नावावर सुमारे तीन एकर सामायिक शेती असल्याची माहिती आहे. शेतीसोबतच रोजंदारी मजुरी करून कुटुंबाचा उदरनिर्वाह सुरू होता. अशा परिस्थितीत कुटुंबातील कर्त्या महिलेचा अचानक मृत्यू झाल्याने कुटुंबावर मोठे आर्थिक व मानसिक संकट ओढवले आहे.
मृत शितल मिलमिले यांच्या पश्चात पती, सासू, एक मुलगा व एक मुलगी असा परिवार आहे. त्यांच्या आकस्मिक निधनाने नातेवाईकांसह ग्रामस्थांमध्ये शोककळा पसरली आहे.
पावसाळ्यात सर्पदंशाचा धोका वाढतो
पावसाळ्यात शेतशिवारात सापांचा वावर वाढत असल्याने शेतकरी व शेतमजुरांनी शेतात काम करताना विशेष खबरदारी घेणे गरजेचे आहे. शेतात जाताना बूट किंवा गमबूट वापरणे, झुडपे अथवा गवतामध्ये हात घालताना सावधगिरी बाळगणे आवश्यक आहे. सर्पदंश झाल्यास कोणतेही घरगुती उपचार न करता वेळ न दवडता तातडीने जवळच्या शासकीय रुग्णालयात उपचारासाठी दाखल करावे, असे आवाहन करण्यात येत आहे
