दारू पिऊन वाहन चालविणाऱ्यांची खैर नाही; हेल्मेट वापरण्याचे ठाणेदार सागर दानडे यांचे वाहनधारकांना आवाहन
सुरेश पाचभाई | मारेगाव
मारेगाव : दिवाळी सणाच्या पार्श्वभूमीवर नागरिकांची सुरक्षितता आणि रस्ते अपघातांना आळा घालण्यासाठी मारेगाव पोलीस ॲक्शन मोडवर आले आहेत. मारेगाव पोलीस स्टेशनच्या हद्दीत दारू पिऊन वाहन चालविणाऱ्यांविरोधात ‘ड्रंक अँड ड्राइव्ह’ मोहीम हाती घेण्यात आली असून, नियमांचे उल्लंघन करणाऱ्या वाहनचालकांवर पोलिसांकडून धडक कारवाई केली जात आहे.दिवाळीच्या काळात बाजारपेठा, रस्ते आणि सार्वजनिक ठिकाणी नागरिकांची वर्दळ वाढते. अशा परिस्थितीत मद्यप्राशन करून वाहन चालविणे स्वतःसह इतरांच्या जीवितालाही धोकादायक ठरू शकते. त्यामुळे मद्यप्राशन करून दुचाकी किंवा अन्य कोणतेही वाहन चालवू नये, असे आवाहन पोलिसांनी केले आहे. मद्यप्राशन करून वाहन चालविताना आढळल्यास संबंधित चालकाविरुद्ध कायद्यानुसार कठोर कारवाई करण्यात येणार आहे.
हेल्मेट वापरा, कुटुंबाची काळजी घ्या!
दुचाकीस्वारांनी प्रवासादरम्यान हेल्मेटचा अनिवार्यपणे वापर करावा. वाहतुकीचे नियम पाळावेत आणि वेगावर नियंत्रण ठेवावे. दिवाळीचा आनंद साजरा करताना स्वतःच्या सुरक्षिततेबरोबरच आपल्या कुटुंबीयांचाही विचार करावा. घरातून बाहेर पडलेला आपला माणूस सुरक्षितपणे घरी परतणे हीच कुटुंबासाठी खरी दिवाळी आहे, असा मोलाचा संदेश पोलिसांकडून देण्यात येत आहे.
दरम्यान, मारेगावचे ठाणेदार सागर दानडे यांनी तालुक्यातील सर्व नागरिकांना दिवाळीच्या मनःपूर्वक शुभेच्छा दिल्या असून, सण उत्साहात आणि सुरक्षित वातावरणात साजरा करण्याचे आवाहन केले आहे. सणाच्या आनंदाला अपघाताचे गालबोट लागू नये, यासाठी नागरिकांनी पोलिसांना सहकार्य करावे, असेही त्यांनी म्हटले आहे.
दारू पिऊन वाहन चालवू नका, हेल्मेटशिवाय दुचाकी चालवू नका आणि सुरक्षित दिवाळी साजरी करा, हाच मारेगाव पोलिसांचा नागरिकांना संदेश आहे.
