शब्दाला जागून प्रचारासाठी शहरात पाऊलही टाकू नये:अंबादास दानवेंचा महायुतीवर थेट हल्ला; म्हणाले- जलसाम्राट आता मौनी बाबा झाले

छत्रपती संभाजीनगर शहरातील भीषण पाणी टंचाईच्या प्रश्नाने आता राजकीय तापमान कमालीचं वाढवलं असून, शिवसेना उद्धव बाळासाहेब ठाकरे पक्षाचे नेते अंबादास दानवे यांनी महायुती सरकारवर जोरदार हल्लाबोल केला आहे. शहरातील नागरिकांना नियमित आणि पुरेसा पाणीपुरवठा करण्यात सरकार पूर्णपणे अपयशी ठरल्याचा आरोप करत, दानवेंनी सत्ताधाऱ्यांच्या कार्यपद्धतीवर तीव्र शब्दांत टीका केली. पाण्यासंदर्भात सातत्याने दिशाभूल करणाऱ्या महायुतीच्या नेत्यांना आता छत्रपती संभाजीनगरमध्ये प्रचार करण्याचा कोणताही नैतिक अधिकार उरलेला नाही, असे ठाम मत त्यांनी व्यक्त केले. शहरातील प्रत्येक घरापर्यंत पाणी पोहोचवण्याच्या घोषणा केवळ कागदावरच राहिल्या असून, प्रत्यक्षात नागरिकांना पाण्यासाठी वणवण करावी लागत असल्याचं वास्तव दानवेंनी अधोरेखित केलं. विशेषतः राज्याचे मंत्री संजय शिरसाट यांचा उल्लेख करत दानवेंनी अत्यंत बोचरी टीका केली. एकेकाळी स्वतःला जलसाम्राट, म्हणवून घेणारे आणि शहरभर बॅनरबाजी करणारे मंत्री आता पाण्याच्या प्रश्नावर ‘मौनी बाबा’ झाले असल्याचा सणसणीत टोला त्यांनी लगावला. शहरात पाण्याचा प्रश्न दिवसेंदिवस गंभीर होत असताना, जबाबदार मंत्र्यांचे मौन नागरिकांच्या संतापात भर घालणारे आहे, असे दानवेंनी म्हटले. पाणीपुरवठा योजनांच्या उद्घाटनावेळी मोठमोठी आश्वासने दिली गेली, मात्र प्रत्यक्षात त्या योजनांचा लाभ नागरिकांपर्यंत पोहोचलाच नाही, असा आरोपही त्यांनी केला. अंबादास दानवे यांनी सोशल मीडिया प्लॅटफॉर्म ‘एक्स’वर पोस्ट शेअर करत महायुती सरकारच्या कारभारावर प्रश्नचिन्ह उपस्थित केले. पाणीपुरवठा योजनेतील अपयश झाकण्यासाठी आता प्रशासनातील अधिकाऱ्यांना नोटिसा बजावल्या जात असल्याचा आरोप त्यांनी केला. स्वतःच्या चुकीच्या नियोजनामुळे आणि अकार्यक्षमतेमुळे निर्माण झालेल्या परिस्थितीचे खापर अधिकाऱ्यांवर फोडण्याचा हा प्रकार म्हणजेच महायुतीने अप्रत्यक्षपणे आपला पराभव मान्य केल्याचा पुरावा आहे, असे दानवेंनी स्पष्ट शब्दांत नमूद केले. प्रशासनावर दबाव टाकून प्रश्न सुटणार नाहीत, तर ठोस निर्णय आणि राजकीय इच्छाशक्ती लागते, असा इशाराही त्यांनी दिला. या मुद्द्यावर बोलताना दानवेंनी मंत्री संजय शिरसाट यांनी पूर्वी केलेल्या एका महत्त्वाच्या वक्तव्याची आठवण करून दिली. जयसिंगपुरा येथील एका कार्यक्रमात सत्कार स्वीकारताना शिरसाट यांनी डिसेंबर 2025 पर्यंत शहराला वाढीव पाणी मिळालं नाही, तर आपण छत्रपती संभाजीनगरमध्ये प्रचारासाठी येणार नाही, असे जाहीरपणे सांगितले होते. त्या वक्तव्याचा संदर्भ देत दानवेंनी सांगितले की, आता डिसेंबर महिना उलटून गेला आहे, तरीही शहराचा पाणी प्रश्न जसाच्या तसा आहे. त्यामुळे शिरसाट यांनी आपल्या शब्दाला जागून आता प्रचारासाठी शहरात पाऊलही टाकू नये, अशी थेट मागणी त्यांनी केली. दानवेंनी पुढे म्हटले की, पाण्याच्या प्रश्नावर नागरिकांच्या भावना अत्यंत तीव्र आहेत. उन्हाळ्याच्या पार्श्वभूमीवर शहरातील अनेक भागांमध्ये पाणीपुरवठा अनियमित झाला असून, टँकरवर अवलंबून राहण्याची वेळ नागरिकांवर आली आहे. अशा परिस्थितीत सत्ताधाऱ्यांनी केवळ आरोप-प्रत्यारोप न करता जबाबदारी स्वीकारून उपाययोजना करायला हव्या होत्या. मात्र, प्रत्यक्षात सत्ताधारी नेते एकमेकांवर दोष ढकलण्यात आणि प्रशासनाला लक्ष्य करण्यात गुंतलेले दिसत आहेत, असा आरोप दानवेंनी केला. एकेकाळी ‘जलसाम्राट’ म्हणून मिरवणाऱ्या मंत्र्यांनी आता या गंभीर प्रश्नावर मौन पाळल्याने जनतेत प्रचंड असंतोष आहे, असेही दानवेंनी नमूद केले. पाणी हा मूलभूत हक्क असून, तो पुरवण्यात अपयशी ठरणे म्हणजे शासनाच्या अस्तित्वावरच प्रश्नचिन्ह उभे राहणे आहे, असे त्यांनी सांगितले. आगामी निवडणुकांच्या पार्श्वभूमीवर प्रचार सभांमध्ये मोठमोठी आश्वासने दिली जात असली, तरी पाण्यासारख्या मूलभूत समस्येवर सरकारने अजूनही ठोस तोडगा काढलेला नाही, याकडे त्यांनी लक्ष वेधले. पाणी प्रश्न मोठा राजकीय मुद्दा बनला एकंदरीत, छत्रपती संभाजीनगरमधील पाणी प्रश्नाने आता केवळ नागरी समस्या न राहता तो मोठा राजकीय मुद्दा बनला आहे. अंबादास दानवेंच्या आक्रमक भूमिकेमुळे महायुती सरकारवर दबाव वाढण्याची शक्यता असून, मंत्री संजय शिरसाट आणि सत्ताधाऱ्यांना या आरोपांना कसे उत्तर द्यावे लागते, याकडे सर्वांचे लक्ष लागले आहे. शहरातील नागरिकांना दिलासा देणारे निर्णय लवकरच जाहीर होतील की हा मुद्दा निवडणुकीपुरताच मर्यादित राहील, हे पाहणे आता महत्त्वाचे ठरणार आहे.