बातमी ऐका (Marathi Voice Reader)
राज्यातील महिलांच्या रजोनिवृत्ती काळात उद्भवणाऱ्या शारीरिक व मानसिक आरोग्य समस्यांवर वेळेवर व शास्त्रीय उपचार मिळावेत, या उद्देशाने सार्वजनिक आरोग्य विभागामार्फत विशेष ‘मेनोपॉज क्लिनिक’ सुरू करण्याचा निर्णय घेण्यात आला आहे. त्यानुसार बुधवारी ता. १४ या क्लिनीकची सुरुवात होणार असून यापुढे दर बुधवारी विशेष बाह्यरुग्ण विभाग (ओपीडी) सुरु करण्यात येणार आहे. त्यामुळे महिलांच्या मासीक पाळीच्या समस्यांमध्ये आरोग्य विषयक मार्गदर्शन होणार आहे. महिलांच्या रजोनिवृत्तीच्या काळात हार्मोन्समधील बदलांमुळे शारिरातील उष्णता वाढ, झोपेचे विकार, चिडचिड, नैराश्य, सांधेदुखी, वजन वाढणे, हृदयविकाराचा धोका अशा विविध समस्या आढळून येत आहेत. मात्र महिलांकडून या समस्यांकडे अनेक वेळा दुर्लक्ष केले जात असल्यामुळे त्यांना पुढील काळात गंभीर समस्यांना सामोरो जावे लागले. या काळात महिलांना योग्य मार्गदर्शन, समुपदेशन व औषधोपचार मिळण्यासाठी आरोग्य विभागाने महिलांसाठी स्वतंत्र ‘मेनोपॉज क्लिनिक’ सुरू करण्याचा निर्णय घेतला आहे. राज्यातील सर्व जिल्हा रुग्णालये, उपजिल्हा रुग्णालये, महानगरपालिका रुग्णालये तसेच निवडक ग्रामीण रुग्णालयांमध्ये हे क्लिनिक सुरू करण्य्च्या सूचना देण्यात आल्या आहेत. राज्यात दर बुधवारी विशेष बाह्य रुग्ण विभाग सुरु केला जाणार असून बुधवारपासून ता. १४ या क्लिनीकला सुरवात केली जाणार आहे. या क्लिनिकमध्ये महिलांची सविस्तर वैद्यकीय तपासणी करण्यात येणार असून आवश्यकतेनुसार उपचार, समुपदेशन, आहार व जीवनशैलीविषयक मार्गदर्शन दिले जाणार आहे. तसेच मानसिक आरोग्य समुपदेशन, कॅल्शियम व व्हिटॅमिन-डी संदर्भातील उपचार आणि आवश्यक तपासण्यांविषयी माहिती दिली जाणार आहे. दर बुधवारी होणाऱ्या या विशेष बाह्यरुग्ण तपासणीचा महिलांनी घ्यावा, रजोनिवृत्ती काळातील लक्षणांबाबत संकोच न ठेवता पुढे यावे, असे आवाहन सार्वजनिक आरोग्य विभागामार्फत करण्यात आले आहे. ‘मेनोपॉज क्लिनिक’मुळे महिलांचे दीर्घकालीन आरोग्य सुदृढ राहण्यास निश्चितच मदत होणार असल्याचे आरोग्य विभागाच्या सुत्रांनी सांगितले.
