राजकीय व सामाजिक क्षेत्रात शोककळा
विदर्भ एस.पी. न्यूज नेटवर्क डेस्क: वणी
वणी : विधानसभा मतदारसंघाचे माजी आमदार तसेच शिवसेनेचे (शिंदे गट) जिल्हाप्रमुख विश्वासभाऊ नांदेकर यांचे रविवारी रात्री मुंबई येथील खासगी रुग्णालयात उपचारादरम्यान निधन झाले. ते काही दिवसांपासून आजारी होते. उपचार सुरू असतानाच त्यांनी अखेरचा श्वास घेतला.
नांदेकर यांच्या निधनाने वणी तालुक्यासह संपूर्ण जिल्ह्यात राजकीय व सामाजिक क्षेत्रात शोककळा पसरली आहे. कणखर नेतृत्व, स्पष्टवक्तेपणा आणि जनतेशी थेट नाते जपणारे नेते म्हणून त्यांची ओळख होती. आमदार म्हणून त्यांनी आपल्या मतदारसंघाच्या विकासासाठी सातत्याने पाठपुरावा केला. सामान्य नागरिकांच्या समस्या सोडवण्यासाठी ते नेहमीच आक्रमक भूमिका घेत असत. त्यामुळे जनतेमध्ये त्यांना मोठा मान होता.
त्यांच्या निधनामुळे शिवसेनेला (शिंदे गट) मोठी हानी झाल्याची भावना पक्षाच्या कार्यकर्त्यांकडून व्यक्त केली जात आहे. निधनाची बातमी समजताच विविध राजकीय पक्षांचे नेते, सामाजिक कार्यकर्ते, शिवसैनिक तसेच नागरिकांनी त्यांच्या निवासस्थानी धाव घेत शोकसंवेदना व्यक्त केल्या.विश्वासभाऊ नांदेकर यांचे पार्थिव वणी येथे आणले जाणार आहे व नांदेकर यांच्या पार्थिवावर पठारपूर येथील त्यांच्या मूळ गावी अंत्यसंस्कार करण्यात येणार असल्याची माहिती निकटवर्तीय यांनी दिली आहे. त्यांच्या पश्चात पत्नी व एक विवाहित मुलगी असा परिवार आहे.
