खोदकाम थांबले, श्रद्धा जागी; कळंबात शिवपिंड–नंदीचा शोध
तालुका प्रतिनिधी कळंब :- रितेश क्षिरसागर
कळंब शहरातील शिरभाते ले-आऊट येथील नगर पंचायतच्या ओपन स्पेसमध्ये सुरू असलेल्या खोदकामादरम्यान पुरातन काळातील शिवपिंड, नंदी व शिवलिंग आढळून आल्याने बुधवारी (दि. १५) परिसरात एकच खळबळ उडाली. घटनेची माहिती समजताच नागरिकांनी घटनास्थळी मोठी गर्दी केली.
नगर पंचायतच्या वतीने समाज भवनाच्या बांधकामासाठी पाण्याच्या टाकीजवळ सकाळी सुमारे ११ वाजता खोदकाम सुरू असताना मजुरांना जमिनीत दगडी संरचना आढळून आली. पुढील खोदकामात नंदी, शिवपिंड व शिवलिंग स्पष्टपणे दिसून येताच काम तात्काळ थांबवण्यात आले.
सापडलेल्या अवशेषांवरून या ठिकाणी पूर्वी शिवमंदिर अथवा धार्मिक स्थळ अस्तित्वात असण्याची शक्यता व्यक्त केली जात आहे. धार्मिक श्रद्धा तसेच ऐतिहासिक वारशाच्या दृष्टीने या स्थळाचे महत्त्व लक्षात घेता नागरिकांकडून पुरातत्त्व विभाग व इतिहासतज्ज्ञांनी तातडीने पाहणी करावी, अशी मागणी होत आहे.
घटनेची माहिती नगर पंचायत व स्थानिक प्रशासनाला देण्यात आली असून, पुढील कोणतेही खोदकाम थांबवून कायद्यानुसार पुरातत्त्व विभागाला कळवावे, अशी मागणी नागरिकांनी केली आहे.
भारतीय पुरातत्त्व कायद्याच्या चौकटीत या स्थळाचे संरक्षण व संवर्धन करण्यात यावे, अशीही भावना व्यक्त होत आहे.
दरम्यान, प्रशासनाकडून अधिकृत पाहणी व निर्णयाची प्रतीक्षा असून, पुढील कारवाईकडे सर्वांचे लक्ष लागले आहे.
