बातमी ऐका (Marathi Voice Reader)
छत्रपती संभाजीनगर: दिवाळीत लक्ष्मीपूजनाचे विशेष महत्त्व आहे. घरात सुख, समृद्धी नांदावी म्हणून माता लक्ष्मीचे पूजन केले जाते. या दिवशी केरसुणी आणि झाडूची पूजा करण्याची देखील परंपरा आहे. लक्ष्मीपूजनाला केरसुणीच्या पूजेचे नेमके काय महत्त्व आहे? याबाबत गुरुजी श्रीरामजी धानोरकर यांनी महत्त्वाची माहिती दिली आहे.
लक्ष्मीचे आवाहन करणे हा एक सुंदर विधी असून आपल्याकडील सुंदर, उत्कट आणि दिव्य गोष्टींचे आपण पूजक असतो. मात्र हे करत असताना आपल्याकडील सर्व वाईट गोष्टी बाहेर काढणे गरजेचे असते. माणसाच्या मनातील मद, मत्सर, राग, द्वेष आणि क्रोध हे विकार बाहेर काढण्याचे व्यावहारिक साधन म्हणजे केरसुणी, झाडू, फडा किंवा खराटा होय.
Diwali 2026: लक्ष्मीपूजन कसे करावे? कोणत्या मंत्राचा जप करावा? जाणून घ्या पूजेची योग्य पद्धत, Video
लक्ष्मीच्या आगमनासाठी घरातील आणि मनातील अवगुण बाहेर काढणे आवश्यक असते. लक्ष्मीपूजनाच्या दिवशी केरसुणीला लक्ष्मीचेच एक छोटे स्वरूप मानून तिची पूजा करणे अत्यंत आवश्यक आणि आगत्याचे मानले जाते. केरसुनीच्या पूजेमुळे लक्ष्मी प्रसन्न होते, कारण ज्या ठिकाणाहून अवगुण जातात तिथे सद्गुणांचा वास होतो. मानवामध्ये अशा प्रकारे सद्गुण उद्दींगित व्हावेत आणि लक्ष्मी रूपी सद्गुणांची प्राप्ती व्हावी, यासाठी केरसुणीची पूजा करणे गरजेचे आहे. या पूजेमुळे सहजासहजी लक्ष्मीची कृपा प्राप्त होते, असे गुरुजी सांगतात.
केरसुनी किंवा फड्याची पूजा करत असताना सर्वप्रथम त्यावर पाणी शिंपावे, त्यानंतर हळद-कुंकू अर्पण करून फुले वाहवीत. यानंतर लाह्या, बत्तासे आणि रेवड्या अर्पण करून दिवा ओवाळावा आणि मगच तिच्या उपयोगास सुरुवात करावी. अशा प्रकारे केरसुनीची पूजा केल्यास घरात लक्ष्मी स्थिर नक्की राहते, असे गुरुजींनी सांगितले आहे.
