जुन्नरमध्ये लंगोटात जल्लोष:सून विजयी होताच देवराम लांडेंचा ‘लंगोट स्टाईल’ जल्लोष, व्हिडिओ व्हायरल; सोशल मीडियावर चर्चा रंगली

पुणे जिल्ह्यातील जुन्नर तालुक्यात जिल्हा परिषद निवडणुकीनंतर एक वेगळाच जल्लोष पाहायला मिळाला. जिल्हा परिषदेचे माजी अध्यक्ष देवराम लांडे यांनी आपल्या सुनेच्या विजयाचा आनंद अत्यंत अनोख्या पद्धतीने साजरा केला. त्यांच्या सून मोनाली अमोल लांडे या घड्याळाच्या चिन्हावर जिल्हा परिषद गटातून विजयी झाल्यानंतर देवराम लांडे थेट लंगोट घालून रस्त्यावर उतरले आणि डीजेच्या तालावर नाचत जल्लोष केला. या अनोख्या सेलिब्रेशनमुळे परिसरात मोठी चर्चा रंगली असून त्याचे व्हिडिओ सोशल मीडियावर वेगाने व्हायरल होत आहेत. मोनाली अमोल लांडे यांच्या विजयाची घोषणा होताच देवराम लांडे यांनी गळ्यात पंचा घालून, अंगावर फक्त लंगोट परिधान करून जल्लोषाला सुरुवात केली. त्यांनी हातात अजित दादांचा फोटो घेतला आणि उत्साहाच्या भरात नाचत विजय साजरा केला. या प्रकारामुळे अनेकांच्या नजरा त्यांच्याकडे वळल्या. काही जणांनी या जल्लोषाचे कौतुक केले, तर काहींनी यावरून टीका केली. मात्र, लांडे यांनी नेहमीप्रमाणे आपल्या वेगळ्या शैलीत विजयाचा आनंद व्यक्त केला. देवराम लांडे यांचे असे अतिउत्साही साजरे करणे नवीन नाही. यापूर्वीही त्यांच्या वाढदिवसानिमित्त त्यांनी अशाच पद्धतीने जल्लोष केल्याचा व्हिडिओ सोशल मीडियावर मोठ्या प्रमाणावर चर्चेत आला होता. त्या वेळीही त्यांनी लंगोट आणि पंचा घालून डीजेच्या तालावर नाचत उत्सव साजरा केला होता. त्यामुळे ते कायमच वेगळ्या कारणांनी चर्चेत राहिले आहेत. यंदाही सुनेच्या विजयाच्या निमित्ताने त्यांनी तोच ‘कित्ता’ गिरवला. कुटुंबात आनंदाचे वातावरण जुन्नरमध्ये या घटनेची जोरदार चर्चा सुरू असून, निवडणुकीच्या निकालानंतर झालेल्या या अनोख्या जल्लोषाने राजकीय वातावरणातही रंग भरले आहेत. मोनाली अमोल लांडे यांच्या विजयामुळे त्यांच्या कुटुंबात आनंदाचे वातावरण असताना देवराम लांडे यांनी तो आनंद अत्यंत वेगळ्या पद्धतीने व्यक्त केला. त्यांच्या या कृतीमुळे सोशल मीडियावर विविध प्रतिक्रिया उमटत आहेत. काही जणांनी त्याला ‘विजयाचा उत्साह’ म्हटले, तर काहींनी त्याला ‘अतिउत्साह’ असे संबोधले. मात्र, देवराम लांडे पुन्हा एकदा आपल्या आगळ्यावेगळ्या शैलीमुळे चर्चेच्या केंद्रस्थानी आले आहेत.