बातमी ऐका (Marathi Voice Reader)
यवतमाळ स्थानिक प्राधिकारी विधान परिषद निवडणुकीत ऐनवेळी माघार घेऊन महाविकास आघाडीला मोठा धक्का देणारे काँग्रेसचे अधिकृत उमेदवार साहेबराव कांबळे यांनी अखेर आज आपल्या शेकडो समर्थकांसह शिवसेना (शिंदे गट) पक्षात जाहीर प्रवेश केला. मुंबईत उपमुख्यमंत्री एकनाथ शिंदे यांच्या प्रमुख उपस्थितीत हा पक्षप्रवेश सोहळा पार पडला. या घडामोडीमुळे यवतमाळ जिल्ह्यात काँग्रेसला मोठे खिंडार पडले असून महायुतीची ताकद मात्र कमालीची वाढली आहे. यवतमाळ विधान परिषद निवडणुकीत साहेबराव कांबळे यांनी पुरेशा संख्याबळाअभावी अचानक आपला उमेदवारी अर्ज मागे घेतला होता. त्यांच्या या अनपेक्षित माघारीमुळे महाविकास आघाडीवर निवडणुकीच्या रिंगणातूनच बाहेर पडण्याची नामुष्की ओढावली होती. या नाट्यमय घडामोडींनंतर मविआ नेत्यांमध्ये प्रचंड खळबळ उडाली आणि काँग्रेसचे ज्येष्ठ नेते माणिकराव ठाकरे यांच्या निवासस्थानी तातडीची बैठकही पार पडली होती. बंडखोरी आणि फितुरीच्या या पवित्र्यानंतर जिल्हा काँग्रेस कमिटीच्या शिफारशीवरून साहेबराव कांबळे यांची काँग्रेसच्या प्रदेश सरचिटणीस पदावरून आणि पक्षातून तडकाफडकी हकालपट्टी करण्यात आली होती. शिंदेंच्या उपस्थितीत बांधले शिवबंधन गेल्या काही दिवसांपासून साहेबराव कांबळे हे शिंदे गटात जाणार असल्याची राजकीय वर्तुळात जोरदार चर्चा होती. आज त्यावर शिक्कामोर्तब झाले. यवतमाळचे पालकमंत्री संजय राठोड आणि उपमुख्यमंत्री एकनाथ शिंदे यांच्या उपस्थितीत झालेल्या या सोहळ्यात कांबळे यांच्यासह जिल्ह्यातील काँग्रेसच्या अनेक महत्त्वाच्या पदाधिकाऱ्यांनी आणि कार्यकर्त्यांनी शिवसेनेत प्रवेश केला. ‘उमेदवारीपेक्षा लोकांचे काम महत्त्वाचे’ – उपमुख्यमंत्री शिंदे साहेबराव कांबळे यांच्या पक्षप्रवेशानंतर बोलताना उपमुख्यमंत्री एकनाथ शिंदे यांनी महाविकास आघाडीवर जोरदार निशाणा साधला. ते म्हणाले, “विधान परिषदेचे काँग्रेसचे अधिकृत उमेदवार साहेबराव कांबळे यांनी आज अधिकृतपणे शिवसेनेत प्रवेश केला आहे. यामुळे यवतमाळ भागात पालकमंत्री संजय राठोड यांच्या हाताला मोठी ताकद मिळेल. साहेबराव यांनी केवळ निवडणुकीपुरता विचार न करता, मतांच्या आकडेवारीतील फरक ओळखला. महायुतीचाच उमेदवार जिंकणार हे स्पष्ट असल्याने, त्यांनी उमेदवारीपेक्षा लोकांचे काम करण्याला प्राधान्य दिले, हा निर्णय मोठा आहे.” उपमुख्यमंत्र्यांनी पुढे बोलताना विश्वास व्यक्त केला की, “या निवडणुकीत महायुतीचे सर्वच्या सर्व १७ उमेदवार निवडून येतील. जे लोक केवळ मोदींचा विरोध करत आहेत, त्यांना जनता त्यांची जागा दाखवून देईल. साहेबराव कांबळे यांच्या माध्यमातून यवतमाळमधील वीटभट्टीवर काम करणाऱ्या महिलांना आणि कष्टकऱ्यांना न्याय देण्याचे काम शिवसेना करेल.” साहेबराव कांबळे यांच्या या राजकीय कोलांटउडीमुळे यवतमाळ जिल्ह्यातील काँग्रेस संघटनात्मक पातळीवर बॅकफूटवर गेली असून, आगामी निवडणुकांमध्ये महायुतीला याचा मोठा फायदा होण्याची शक्यता वर्तवली जात आहे.
