आईच्या कुशीत परतली चिमुरडी:1600 सीसीटीव्हींच्या मदतीने अपहरणाचा कट उघड; नेमकी कशी घडली घटना, वाचा..

एका ३ महिन्यांच्या चिमुरडीचे अपहरण करून पोलिसांना गुंगारा देणाऱ्या टोळीला मुंब्रा पोलिसांनी अत्यंत कौशल्याने बेड्या ठोकल्या आहेत. तब्बल १६०० हून अधिक सीसीटीव्ही फुटेजची तपासणी आणि अहोरात्र घेतलेल्या कष्टांनंतर, अपहरण झालेल्या बालिकेची अकोला जिल्ह्यातून सुखरूप सुटका करण्यात आली आहे. या कारवाईमुळे मुंब्रा पोलिसांच्या चिकाटीचे सर्वत्र कौतुक होत आहे. सलग ६ दिवस दररोज १६ ते १८ तास काम करून पोलिसांनी हा गुन्हा उघडकीस आणला आहे. नेमकी घटना कशी घडली? २२ जानेवारी २०२६ रोजी संध्याकाळी ६ वाजेच्या सुमारास, मुंब्रा येथील खाडीमशीन रोडवर ही घटना घडली. फिर्यादी फरजाना मन्सुरी या आपल्या दोन मुलींना घेऊन रस्ता ओलांडत असताना, एका अनोळखी महिलेने ‘मदत करण्याच्या’ बहाण्याने त्यांच्या ३ महिन्यांच्या मुलीला (आफिया) कडेवर घेतले. गर्दीचा फायदा घेत त्या महिलेने बाळासह तिथून पळ काढला. याप्रकरणी मुंब्रा पोलिस ठाण्यात गुन्हा दाखल करण्यात आला होता. आरोपी महिलेने अनेकदा कपडेही बदलले ठाण्याचे पोलिस आयुक्त आशुतोष डुंबरे म्हणाले, आरोपी महिलेने पोलिसांची दिशाभूल करण्यासाठी मुंब्रा ते ठाणे प्रवासादरम्यान अनेकदा आपले कपडे, नकाब आणि बाळाचे पांघरूण बदलले होते. एका रिक्षाचालकाचा माग काढत आणि तांत्रिक तपासाच्या आधारे पोलिसांनी प्रथम नसरीन इकलाख शेख या महिलेला ताब्यात घेतल्याचे सांगण्यात आले आहे. पोलिसांनी वापरली आधुनिक कार्यपद्धती लहान मुलांच्या अपहरणाच्या केसेसमध्ये वेळेला अत्यंत महत्त्व असते. जितका उशीर होईल, तितकी बाळ परराज्यात किंवा मानवी तस्करीच्या जाळ्यात जाण्याची शक्यता जास्त असते. पोलिसांनी वेळेत हालचाल करून हे रोखले. या गुन्ह्यात पोलिसांनी तांत्रिक तपास आणि मानवी बुद्धिमत्ता यांचा अचूक संगम साधला. आरोपींनी वारंवार वेशांतर करून आणि रेल्वे स्थानकांवर छुप्या मार्गांचा वापर करून पोलिसांना चकवा देण्याचा प्रयत्न केला. मात्र, पोलिसांनी केवळ सीसीटीव्ही फुटेजवर अवलंबून न राहता, बाळाच्या पायातील सॉक्स सारख्या सूक्ष्म खुणांवरून आरोपींचा माग काढला. १६०० कॅमेऱ्यांचे विश्लेषण, गुप्त बातमीदारांचे जाळे आणि अकोल्यापर्यंतचा वेगवान पाठलाग यामुळे अवघ्या ६ दिवसांत चिमुरडीची सुखरूप सुटका झाली. हा तपास पोलिसांच्या चिकाटीचे आणि आधुनिक कार्यपद्धतीचे उत्तम उदाहरण आहे. अकोल्याच्या पातूर तालुक्यातील खेटरीत बाळ नसरीनच्या चौकशीतून धक्कादायक माहिती समोर आली. हे बाळ अकोला जिल्ह्यातील पातूर तालुक्यातील खेटरी गावात असल्याचे निष्पन्न झाले. मुंब्रा पोलिसांनी तातडीने तिथे पोहोचून आरोपी मोहम्मद मुजीब गुलाब (३१ वर्षे) आणि त्याची पत्नी खैरुन्निसा (३०) यांना ताब्यात घेतले. अपहरण झालेली ३ महिन्यांची आफिया सुखरूप असून तिला तिच्या आईच्या स्वाधीन करण्यात आले आहे.