जिल्ह्यातील पंचायत समित्यांच्या सार्वत्रिक निवडणुकीनंतर आता सर्वांचे लक्ष लागून असलेल्या सभापती आणि उपसभापती निवडीचे वेळापत्रक जाहीर झाले आहे. जिल्हाधिकारी दिलीप स्वामी यांनी दिलेल्या आदेशानुसार, जिल्ह्यातील सर्व ९ पंचायत समित्यांच्या सभापती आणि उपसभापती निवडीसाठी १० मार्च २०२६ रोजी दुपारी २:०० वाजता संबंधित पंचायत समितीच्या सभागृहात विशेष सभा आयोजित करण्यात आली आहे. छत्रपती संभाजीनगर पंचायत समितीचे सभापतिपद सर्वसाधारण प्रवर्गासाठी राखीव आहे. या निवडीसाठी जिल्हाधिकाऱ्यांनी प्रत्येक तालुक्यासाठी स्वतंत्र पीठासीन अधिकाऱ्यांची नियुक्ती केली असून सभापतिपदाचे आरक्षणही निश्चित करण्यात आलेले आहे. सभापती आणि उपसभापतिपदासाठी उमेदवारी अर्ज सभेच्या वेळेपूर्वी दोन तास आधी स्वीकारले जातील. सभेसाठी एकूण सदस्यांच्या १/३ गणपूर्ती असणे आवश्यक आहे. प्रथम सभापतिपदाची निवड करण्यात येईल आणि त्यानंतर लगेच उपसभापतिपदासाठीची निवडणूक प्रक्रिया पार पडेल. जिल्हाधिकाऱ्यांनी या निवडीसाठी कडक सूचना दिल्या असून पोलिसांचा बंदोबस्त ठेवण्याचेही आदेश दिले आहेत.
