सुरेश पाचभाई, मारेगाव
मारेगाव : मार्डी–बामर्डा जंगल परिसरात धावत्या दुचाकीस्वाराला लाथ मारून खाली पाडत लूटमार करण्याचा थरारक प्रयत्न सोमवारी रात्री घडला. मात्र नशिबाच्या जोरावर हा मोठा अनर्थ टळला असून, तब्बल ३ लाख रुपयांची रोकड असलेली बॅग दरोडेखोरांच्या हाती न लागता सुरक्षित सापडल्याने सर्वांनी सुटकेचा नि:श्वास सोडला.
चोपण येथील रहिवासी चेतन विजय चिंचोळकर (वय २५) हे सोमवारी रात्री सुमारे ८.५० वाजता वणीहून आपल्या गावाकडे दुचाकीने परतत होते. त्यांच्या जवळ शेती खरेदीसाठी आणलेली ३ लाख रुपयांची रोकड बॅगेत होती. मार्डी ते बामर्डा दरम्यानच्या जंगल पट्ट्यात दबा धरून बसलेल्या तीन अज्ञात दुचाकीस्वारांनी त्यांचा पाठलाग केला.
दरम्यान, दरोडेखोरांनी चालत्या दुचाकीला जोरात लाथ मारल्याने चेतन रस्त्यावर कोसळले. त्याच वेळी त्यांच्या पेट्रोल टाकीवर ठेवलेली पैशांची बॅग उडून रस्त्याच्या कडेला झाडपाल्याच्या कचऱ्यात जाऊन पडली. खाली पडलेल्या चेतनची आणि त्यांच्या दुचाकीची दरोडेखोरांनी झडती घेतली, मात्र त्यांना काहीही हाती लागले नाही.
याचवेळी समोरून इतर वाहने येत असल्याचे पाहून पकडले जाण्याच्या भीतीने तिन्ही आरोपी घटनास्थळावरून पसार झाले.
प्रारंभी बॅग चोरीला गेल्याचा समज झाल्याने चेतन यांनी मारेगाव पोलीस ठाण्यात धाव घेत तक्रार नोंदवली. मंगळवारी सकाळी पोलिसांनी घटनास्थळाचा पंचनामा केला असता, रस्त्याच्या कडेला झाडीत ती बॅग सुरक्षित आढळून आली. बॅगेतील संपूर्ण ३ लाख रुपयांची रोकड आणि महत्त्वाची कागदपत्रे अबाधित असल्याचे स्पष्ट झाले.
या घटनेमुळे वणी–नांदेपेरा–वडकी मार्गावरून प्रवास करणाऱ्या नागरिकांमध्ये भीतीचे वातावरण निर्माण झाले आहे. मारेगाव पोलीसांनी अज्ञात दरोडेखोरांविरुद्ध गुन्हा नोंदवून त्यांचा शोध सुरू केला आहे.
